Tomorqa yerlardan unumli foydalanmagan fuqarolarga qanday chora ko‘riladi?

Parlament quyi palatasining 2020 yil 16 aprel kuni bo‘lib o‘tgan majlisida deputatlar «O‘zbekiston Respublikasining Ma'muriy javobgarlik to‘g‘risidagi kodeksiga qo‘shimcha va o‘zgartishlar kiritish haqida»gi qonun loyihasini muhokama qildilar.

Ta'kidlanganidek, Oliy Majlis Qonunchilik palatasi deputatlari hududlarga chiqib aholining tomorqa yerlardan foydalanish holatlarini tahliliy o‘rganmoqdalar. O‘rganishlar shuni ko‘rsatmoqdaki, ko‘plab aholi o‘z ekin maydonlaridan imkon qadar unumli foydalanayotgan bir paytda, ayrim fuqarolar tomorqalarini o‘z holiga tashlab qo‘yganlar.

Belgilangan tartib-taomilga binoan hozirda tomorqaga qanday ekin ekish aholining o‘z takliflari asosida shakllantiriladi. Biroq shunga qaramay tomorqa egasi u yoki bu mahsulotni yetishtirishni o‘zi rejalashtirsa-yu, amalda uni bajarmasa, bu holat oziq-ovqat zaxirasini shakllantirishga ham salbiy ta'sir qiladi va albatta bunday loqaydlik o‘z bahosini olish shart.

Shundan kelib chiqib, «O‘zbekiston Respublikasining Ma'muriy javobgarlik to‘g‘risidagi kodeksiga qo‘shimcha va o‘zgartishlar kiritish haqida»gi qonun loyihasi ishlab chiqildi. Loyiha bilan ushbu kodeksni yangi 65-1-modda bilan to‘ldirish taklif qilinyapti. Unga muvofiq, tomorqa yerlardan unumli foydalanmaganlik uchun ma'muriy javobgarlik belgilanmoqda.

Ya'ni, tomorqaga o‘z tanlovi asosida biron-bir qishloq xo‘jalik ekini ekmagan fuqarolar avval ogohlantiriladi. Keyin bazaviy hisoblash miqdorining bir baravaridan uch baravarigacha miqdorda jarima solinadi. Agar mazkur holat ma'muriy jazo chorasi qo‘llanilganidan keyin bir yil davomida takroran sodir etilgan bo‘lsa, bu qiymat uch baravaridan besh baravarigacha miqdorda bo‘lishi belgilanmoqda.

Mazkur qonun loyihasining qabul qilinishi tomorqa yer uchastkalaridan yanada samarali foydalanish, yer uchastkasi egalarining mas'uliyatini oshirish va oxir-oqibatda oziq-ovqat xavfsizligi hamda aholi bandligini ta'minlashga xizmat qiladi, deyiladi parlament saytidagi xabarda.