O‘zbekistonda karantin davrida mahalliy yo‘nalishlarda avia va temir yo‘l qatnovlarini yo‘lga qo‘yishning vaqtinchalik tartibi e'lon qilindi.
Maxsus komissiya tomonidan tasdiqlangan tartib haqida Transport vazirligi Axborot xizmati rahbari Navro‘z Ashurmatov AOKA huzuridagi shtabda o‘tkazilgan brifingda ma'lum qildi.
O‘rnatilgan tartibga muvofiq:
- Avia va temir yo‘l reyslariga chiqish istagida bo‘lgan yo‘lovchilar koronavirus infeksiyasiga test topshirishi lozim.
- Bunda Sanitariya-epidemiologik osoyishtalik markazi tomonidan koronavirus infeksiyasiga test tahlillari olinganiga 120 soatdan ko‘p bo‘lmagan va tahlil natijasi manfiy ekani haqidagi ma'lumotnomaga ega bo‘lgan yo‘lovchilar reyslarga qo‘yiladi.
- Barcha yo‘lovchilar aeroport va temir yo‘l vokzallari hududiga kirishdan oldin tana harorati o‘lchanadi.
- Tana harorati 37 S dan yuqori bo‘lmagan yo‘lovchilar dezinfektor yordamida zararsizlantiriladi hamda havo va temir yo‘l transportlariga bir martalik himoya niqoblari va qo‘lqoplarda kiritiladi.
- Tana harorati 37 S dan yuqori bo‘lgan yo‘lovchilarga avia va temir yo‘l xizmatlaridan foydalanishga ruxsat berilmaydi. Bunday holatlarda yo‘lovchiga chipta puli belgilangan tartibda qaytarib beriladi.
- Yo‘lovchilar aeroport va temir yo‘l vokzallarida ijtimoiy masofani saqlashlari hamda yo‘naltiruvchi maxsus tasmalar bo‘ylab harakatlanishlari shart.
- Aeroport va temir yo‘l vokzallarida umumiy ovqatlanish, xizmat ko‘rsatish va savdo shoxobchalarining faoliyat yuritishiga yo‘l qo‘yilmaydi. Yo‘lovchilar savdo avtomatlaridan foydalanishlari mumkin.
- Yo‘lovchilar havo kemalariga va temir yo‘l vagonlariga ijtimoiy masofani saqlagan holda joylashtiriladi.
- Avia va temir yo‘l qatnovlariga elektron chiptalar onlayn tarzda sotiladi.
Qatnov vaqtida:
- yo‘lovchilar qatnov vaqtida samolyot salonida va vagonlar bo‘ylab harakatlanishi taqiqlanadi (hojatxonadan foydalanish holatlari bundan mustasno);
- parvoz vaqtida yo‘lovchilarga faqatgina 250 ml hajmdagi qadoqlangan ichimlik suvlari beriladi — oziq-ovqat mahsulotlari, turli xil jurnal va gazetalar tarqatilmaydi (avariya holatidagi harakat yo‘riqnomasi bundan mustasno);
- poyezd vagonlarida yo‘lovchilarga berilgan bir martalik himoya niqoblari va qo‘lqoplarini yechishga ruxsat berilmaydi (yo‘lovchilarning suv ichish holatlari bundan mustasno);
- vagonlarning hojatxona hamda tamburlarida yo‘lovchilarning to‘planishlariga yo‘l qo‘yilmaydi;
- yo‘lovchilar uchun hojatxonalar sanitariya va gigiyena tozalovchi vositalari, antiseptik vositalari bilan to‘liq ta'minlanadi.
Yo‘lovchilarning havo kemasi bortida va temir yo‘l vagonlarida joylashuvi ijtimoiy masofani saqlash tamoyili asosida quyidagi ko‘rinishda amalga oshiriladi:
Ta'kidlanishicha, mazkur vaqtinchalik tartib talablari buzilishida aybdor bo‘lgan shaxslar epidemiyalarga qarshi kurash qoidalarini buzganlik uchun ma'muriy javobgarlikka tortiladi.
Eslatib o‘tamiz, O‘zbekistonda hududlararo transport harakatiga 18 may, dushanba kunidan boshlab ruxsat berilgan.
Maxsus komissiya qarori bilan, 18 maydan e'tiboran Toshkent shahridan Nukus, Urganch, Termiz shaharlariga aviaqatnovlar (borish va qaytish) tiklanadi. Shuningdek, Toshkent shahridan Navoiy, Buxoro, Qarshi shaharlariga «Afrosiyob» tezyurar poyezdi hamda Farg‘ona vodiysiga temir yo‘l qatnovi (borish va qaytish) qayta yo‘lga qo‘yiladi.
Mamlakatda karantin muddati 1 iyunga qadar uzaytirilgan.
