Мақоладан сўнг: Янгийўлда президент совғаси сифатида 3 хонали квартира берилди

Бироз аввалроқ Тошкент вилояти, Янгийўл туманида истиқомат қилувчи Алиевлар оиласи президент совғаси сифатида ваъда қилинган квартира 1,5 йилдан буён туман масъуллари томонидан берилмай келаётгани ҳақида шикоят қилган, бу мурожаат асосида Kun.uz сайтида мақола эълон қилинганди. Маълум қилинишича, мурожаат натижаси узоқ куттирмади, масъуллар оилага уйни топширишган.

Яна Янгийўлга бордик. Президент совғаси Янгийўл шаҳрида қурилаётган 7 қаватли бинолар жойлашган массивдан берилган экан. Оила катталари билан учрашдик.

{Yii::t(}

Ўтказиб юбориш 6s

Ўтказиб юбориш

«Мақоладан сўнг мутасаддилар келишди. Бизга 2 сотихли, 3 хонали уй тавсия қилишди. Кейин вилоят ҳокимлигидан одам келиб, «президент Янгийўл шаҳридаги уйлардан берилишини айтган» деди ва шаҳардан шу уйни беришди.

Худойимга беадад шукр. Ташвишларимиз ортда қолди. Ҳаммага раҳмат. Авваламбор, президентимизнинг шунчалик халқпарварлигига, етимпарварлигига раҳмат айтамиз. Президент сиёсатини рўёбга чиқарган ҳокимлик вакилларига ҳам раҳмат айтамиз. Ҳозир жуда ҳам хурсандмиз. Хурсандчиликда гап ҳам келмас экан. Ҳайратланиб сўраган одамлар ҳам бўлди. Негаки, одамлар ҳамма нарса қуруқ гап бўлишига кўникиб қолишган экан. Биз ҳам президентимизнинг сиёсатини амалда кўрсатиб беришга ҳиссамизни қўшдик деб ўйлаймиз. Шу ишлар билан биз ва атрофимиздагилар бу сиёсатни амалда кўрдик. Ҳамма танишларимиз хурсанд. Президент уй совға қилибди деганни тасаввур қилолмас эдик. Ҳозир мана бу ишлар давр талабига мос ишлар бўлди», дейди оила бошлиғи Муҳаммадзуфар Алиев.

Президент учрашиб суҳбатлашган онахон Зулайҳо Алиевадан ҳам яна икки оғиз фикр сўрадик.

«Бизга қўшалоқ байрам бўлди. Чунки, 30 август куни туман, шаҳар ва вилоят ҳокимлигидан келишиб, невараларимга телевизор совға қилишди. Невараларимнинг хурсандчилигини кўриб ўзимнинг ҳам кўнглим анча кўтарилди. Кейин уйларни тавсия қилишди. Шу билан 31 август куни чақиришди. Туман ҳокими одам жўнатиб мени шу ерга олиб келишди. Вилоят ҳокими келишини айтишди. Ҳоким келганда у билан гаплашдик. Менга ҳужжатларимни кўришганини, шу уйни менга беришларини айтишди. Аввал ишонмадим. Қўлимга калит беришганидан кейин ишондим. Вилоят ҳокими бу уй менга берилганини, президент совғаси эканлигини таъкидлади. Менга қараган шифокорлар, ҳокимлик мутасаддиларига раҳмат айтаман», дейди Зулайҳо Алиева.

Ушбу масаланинг хат-ҳужжатлари билан шуғулланиб юрган 3 нафар гўдакнинг амакиси Умарали Алиевдан ҳам муносабатини сўрадик.

«Оммавий ахборот воситаларида ёритилганидан сўнг, туман ҳокими ва бошқа мутасаддилари уйимизга келишди. Бизга Янгийўл туманидан 3 хонали намунали уйлардан тавсия қилишди. Биз рози бўлгандик. Бироқ вилоят ҳокимлигидан келишганда президент янги массивдан совға қилгани сабабли шу уйни беришди. Биз олдин ҳам айтганимдек, қаердан берса ҳам «шу президент совғаси» десин, олаверишимизни айтдим. 1 сентябрь куни шаҳар ҳокимиятидан чақиришди, онамга калитларни беришди. Янгийўл шаҳри ҳокимиятидан қарор чиқариб беришди», дейди у.

Масала юзасидан Тошкент вилояти ҳокимлиги ахборот хизмати раҳбари Беҳзод Қобулов билан боғландик. У мурожаат зудлик билан ўрганиб чиқилгани ва Тошкент вилояти ҳокими вазифасини бажарувчи Рустам Холматов Зулайҳо Алиева билан учрашиб, аёлга «Фаровон» МФЙдаги 12-уйнинг 2-хонадони калитини топширгани ҳақида маълумот берди.

Вилоят раҳбари буйруғи билан уй жиҳозларга тўлдирилган. Айни вақтда уй бўйича дастлабки ҳужжатлаштириш ишлари бошланган ва тегишли баённома қабул қилинган. Мазкур ҳужжат негизида расмийлаштириш ишлари олиб борилмоқда.

Танқиддан кўп вақт ўтмай мутасаддилар томонидан бу танқид инобатга олиниб, амалий ҳаракатлар бошланиши ижобий тенденция, албатта. Президент ваъдаси бажарилди, 3 нафар етим болакайга бошпана берилди. Уй чиндан ҳам совға сифатида зарур жиҳозлар ва мебеллар билан тўлдирилган. Болаларнинг мактаби масаласи ҳам ҳокимлик томонидан назоратга олинган. Энди оиланинг кексалари бу мурғак болаларнинг тақдиридан хотиржам бўлиши мумкин.