Трамп янги дедлайн белгилади – энди Путин ўт очишни 10-12 кун ичида тўхтатиши керак

АҚШ президенти Доналд Трамп Владимир Путинга Украинада ўт очишни тўхтатиш учун берган 50 кунлик муддатини қисқартираётганини айтди. Бу ҳақда у Буюк Британияга ташрифи чоғида мамлакат бош вазири Кир Стармер билан учрашувда айтиб ўтди.

«Президент Путиндан хафсалам пир бўлди, ундан жуда хафсалам пир бўлди. Мен унга берган 50 кунимни камроқ муддатга қисқартирмоқчиман, чунки нима бўлишини аллақачон биламан, деб ўйлайман», – деди Трамп. У айнан нимани билишини айтаётганини очиқламаган.

АҚШ президенти Путин билан бир неча бор телефон орқали гаплашгани, бироқ бу суҳбатлардан кейиноқ РФ қўшинлари Украина шаҳарларини ўққа тутишда ва «кўплаб одамларни ўлдириш»да давом этганини таъкидлади. «Биз буни ҳал қилишимиз керак бўлади», – деди Трамп.

Бу баёнотидан тахминан бир соат ўтганида Трамп янги ултиматум муддатига ойдинлик киритди. «Бугундан ҳисобланганда 10 ёки 12 кун муддатга янги дедлайн белгиламоқчиман», – деган у.

Россия бозори Трампнинг сўзларига салбий реакция кўрсатди. Москва биржаси индекси АҚШ президентининг илк баёнотидан кейин ярим соатдан камроқ вақт ичида 1,5 фоизга пасайганди (2777 пунктдан 2737 пунктгача). Кейинроқ индекс яна ўсишни бошлаганди, аммо Трампнинг янги дедлайн муддатига аниқлик киритиши ортидан янада пастга қулади – 2730 пунктлик нуқтагача.

Россияда урушни якунлаш учун 50 кун борлиги ҳақида Трамп 14 июл куни эълон қилганди – шу билан бир вақтда у Украинага янги қуроллар етказиб берилишига ҳам ваъда берган. У нима учун шундай муддат ўрнатганига изоҳ бермаган.

Трамп Москва ўт очишни тўхтатишдан бош тортадиган тақдирда Россиядан энергетика ресурсларини харид қиладиган барча мамлакатларга АҚШ билан савдода 100 фоизлик божлар жорий этилишини айтган. Бундай чекловлар таъсирига тушиши мумкин бўлган мамлакатлар қаторида Хитой ва Ҳиндистон ҳам бор.

РФ президенти матбуот котиби Дмитрий Песков Москва Трампнинг баёнотларига «жуда жиддий» қараши ҳамда уларни «таҳлил қилиши»ни билдирганди. Песков «агар лозим деб топса» Путиннинг ўзи Трампнинг ултиматумига шахсан муносабат билдириши мумкинлигини айтганди. Лекин ўтган вақт мобайнида у буни «лозим деб топмади».