Россиялик овчи Сурхондарёда Қизил китобга киритилган морхўрларни овлади

Константин Самсонов ва унинг жамоаси “Samsonov Hunter” каналида Ўзбекистонда уюштирилган ов видеосини эълон қилди. Маълум бўлишича, ушбу видео 1 йил олдин суратга олинган. Бироқ айрим сабабларга кўра эълон қилинганидан 3 кун ўтиб ўчирилган. Бу сафар у қайта эълон қилинган.

Филмдан кўринишича, овчи ва тасвирга олиш гуруҳи Сурхондарё вилояти ҳудудида, тоғли манзилда бўлишган. Овчи 2 бош морхўр (тоғ эчкиси) ҳамда битта бўрини овлаган. Морхўрлардан бирига икки бор ўқ узилган, иккинчиси битта ўқ теккандаёқ йиқилган. Сўнгра овчи қорли тоғда югуриб кетаётган бўрига қарата ўқ узган.

Kun.uz ҳолат юзасидан Экология вазирлигига сўров юборди.

Бу россиялик овчиларнинг Ўзбекистонда Қизил китобга киритилиган жониворларни овлаши билан боғлиқ илк ҳолат эмас. 2021 йил Россия фуқароси Е.П.Широков Бўстонлиқ туманида 1 дона қўнғир айиқни отиб, у билан ваҳшийларча суратга тушганди. Ўшанда унга 2 дона Тяншан қўнғир айиғини отишга рухсатнома берилган. Жамоатчиликнинг кескин эътирозидан сўнг овчидан иккинчи қўнғир айиқни овлашга берилган рухсатнома қайтариб олинган эди.

2023 йилда эса россиялик овчи Сергей Мазуркевич ҳам Ўзбекистонда ов уюштириб, унинг видеосини эълон қилганди. У Сурхондарё вилояти ҳудудида морхўр ва архарни отиб ўлдирган. Ўшанда Экология вазирлиги вакили овчи морхўр ва архарни қонуний тарзда овлаганини билдирганди.

Қизил китобга киритилган жониворларни овлаш учун рухсатнома қонунчиликда кўрсатилган тўловни амалга оширгандан кейин берилади. Чет эллик жисмоний ва юридик шахслар бир бош морхўрни овлаш учун 25 минг доллар тўлаши керак бўлади.

Маълумот учун, морхўр бурама шохли така бўлиб, Ўзбекистон Қизил китобига ҳамда Халқаро табиатни муҳофаза қилиш иттифоқининг рўйхатига киритилган, йўқолиб кетиш арафасида турган, локал тарқалган кенжа тур ҳисобланади. Денгиз сатҳидан 1500-2500 метр баландликдаги тоғларнинг тошлоқ жойларида яшайди. 1950-1970 йилларда морхўрлар сони кескин камайган. Экология вазирлигининг 1 йил олдинги маълумотига кўра, “Сурхон” давлат қўриқхонасида белги қўйилган морхўрлар сони 800 бошдан ошган.