Трамп: Эрон билан келишув бўлмаса, қаттиқ зарба берилади

АҚШ президенти Доналд Трамп Эронга қарши урушни тўхтатиш бўйича музокаралар муваффақиятсиз якунланса, Эроннинг асосий энергетика ва нефт инфратузилмасига, жумладан Харк оролига ҳам зарба бериш билан таҳдид қилди.

“Агар қандайдир сабабга кўра яқин орада келишувга эришилмаса — эҳтимол, шундай бўлади ҳам — ва агар Ҳўрмуз бўғози дарҳол ‘бизнес учун очилмаса’, биз Эрондаги ажойиб ‘иштирокимиз’ни уларнинг биз атайин ҳали ‘тегмаган’ барча электр станциялари, нефт қудуқлари ва Харк оролини (балки барча тузсизлантириш қурилмаларини ҳам!) портлатиб, бутунлай йўқ қилиш билан якунлаймиз”, — деб ёзди Трамп 30 март, душанба куни Truth Social ижтимоий тармоғида.

Унинг таъкидлашича, АҚШ Теҳрондаги “янги ва ақллироқ режим” билан “жиддий музокаралар” олиб бормоқда ва аллақачон “сезиларли тараққиёт”га эришилган. Бундан олдин Трамп журналистларга Эрон можарони тўхтатиш учун Вашингтон томонидан воситачилар орқали етказилган талабларнинг аксариятига рози бўлганини айтган эди.

Шу билан бирга, 29 март куни АҚШ президенти Financial Times газетасига берган интервюсида Эрон нефт саноати устидан назорат ўрнатишни исташини билдирган. Бундай қадам эса Эрон нефтининг катта қисми экспорт қилинадиган Харк оролини эгаллашни англатади.

“Балки, биз Харк оролини эгаллармиз, балки йўқ. Бизнинг имкониятларимиз кўп”, — деди Трамп. Оролнинг Эрон томонидан қандай ҳимоя қилинаётгани ҳақидаги саволга эса у: “Уларда қандайдир мудофаа бор деб ўйламайман. Биз уни осонлик билан эгаллашимиз мумкин”, — деб жавоб берган.