АҚШнинг Яқин Шарққа зарбалари, Озарбойжоннинг Арманистонга талаби ва Россияда Эквадор бананларига тақиқ — кун дайжести

Дунёда содир бўлаётган аҳамиятли янгиликлар, воқеа-ҳодисалар ва баёнотларнинг қисқача шарҳи билан одатдагидек кун дайжестида таништирамиз.

АҚШнинг Сурия ва Ироққа зарбалари

Кеча тунда америкаликларнинг Иорданиядаги ҳарбий базасига қилинган ҳужумга жавобан АҚШ Сурия ва Ироқдаги Эронга алоқадор ҳарбий объектларга зарба берган.

B-1 Lancer бомбардимончи самолёти воситасида амалга оширилган авиазарбалари доирасида 85 дан ортиқ нишон йўқ қилинган.

125 дан ортиқ юқори аниқликдаги ракеталар билан зарбалар асосан Эрон ислом инқилоби муҳофизлари корпуси билан боғлиқ базалар, лагерлар, лашкарлар гуруҳлари тўпланган комплексларга қарата берилган, деган АҚШ марказий қўмондонлиги.

АҚШ бу зарбаларни 5 кундан бери анонс қилиб келади. CNN мухбирига кўра, 5 кунлик ушланиш туфайли Эрон объектлардан асосий инсонлари ва қурол-яроғларини олиб чиқишга муваффақ бўлган.

АҚШ президенти Жо Байден Ироқ ва Сурияда Эрон «Америка қўшинларига ҳужум қилиш учун» фойдаланадиган объектларга зарбалар ўзининг буйруғи билан амалга оширилганини таъкидлаган.

Байденга кўра АҚШ Яқин Шарқ ёки дунёнинг бирор нуқтасида кескин можарога интилмайди.

«Лекин бизга зарар етказмоқчи бўлганларнинг барчаси билиб қўйиши керакки, агар америкаликка зиён етса биз, албатта, жавоб қайтарамиз», — деган Байден.

АҚШ Ироқ ва Сурияга берилган мазкур зарбалар муваффақиятли чиққанини таъкидлаган. Ҳозирча АҚШнинг Сурия шарқидаги зарбалари туфайли камида 13 киши ўлдирилгани ҳақида хабарлар берилди.

Яна Залужний ҳақида

Украина ҳукумати АҚШни бош қўмондон Валерий Залужнийни истеъфога чиқариш борасида огоҳлантирган.

Washington Post нашри ўзининг икки манбасига таяниб хабар беришича, Оқ уйдагилар бу қарорни қўллаб-қувватламаган, бироқ қарши ҳам чиқмаган. Бу президент Зеленскийнинг суверен танлови эканини айтишган.

Зеленский ҳозирча Залужнийни истеъфога чиқариш ҳақида расмий фармон эълон қилмаган ва бу қачон рўй бериши ҳам номаълум.

Бироқ нашрнинг ёзишича аввалдан огоҳлантириш Вашингтонга Зеленскийдан бундай қилмасликни сўраш имкониятини яратган.

Ўтган куни Зеленский олий бош қўмондонлик йиғилишини ўтказган, унда Залужний ҳам ўз доклади билан қатнашган.

Арманистон – Озарбойжон муносабатлари

Агар Арманистон ўз конституциясига ўзгартиришлар киритса биз тинчликка эришамиз, деган Озарбойжон президенти Илҳом Алиев.

«Озарбойжон ва Арманистон ўртасида де-факто тинчлик мавжуд, икки давлат чегарасида бир неча ойдан буён тинч вазият ҳукм сурмоқда. Агар Арманистон конституцияси ва бошқа тегишли ҳужжатлар ўзгартирилса сулҳга эришиш мумкин. Франция минтақада деструктив сиёсат олиб бориб, оловга ёғ сепиш принципи бўйича ҳаракат қилмоқда», — деган Алиев.

Алиевнинг айтишича, Арманистоннинг бир қатор меъёрий-ҳуқуқий ҳужжатларида Озарбойжонга ҳудудий даъволар акс этган ҳаволалар бор, кўплаб конвенциялар ва бошқа ҳужжатларда улар Озарбойжоннинг Қорабоғ устидан суверенитетини тан олишмайди. Алиевнинг қайд этишича, Арманистоннинг Озарбойжонга халқаро судлардаги эътирозлари Озарбойжоннинг ҳудудий яхлитлиги Арманистон томонидан тан олинмаслигига, Қорабоғнинг Озарбойжондан ажралиб чиқишига асосланган.

Алиевнинг фикрича, бу эътирозларга чек қўйиш, Арманистон конституциясига ва бошқа меъёрий-ҳуқуқий ҳужжатларга ўзгартиришлар киритиш лозим. Тинчлик жараёни якунланиши учун бу ишлар қисқа муддатларда амалга оширилади, дея умид билдирган Алиев.

Дарвоқе, Арманистон ортиқ Россиянинг ҳарбий ҳамкори бўла олмайди. Арманистон бош вазири Никол Пашинян ҳозирги вақтда объектив ва субъектив сабабларга кўра бу имконсиз эканини таъкидлаган.

Бундан ташқари, Ереван 2024 йилгача ўз армиясини ривожлантиришнинг янги концепциясини ишлаб чиқишни ва бошқа давлатлар билан муносабатини қайта кўриб чиқишни режалаштирмоқда.

Россияда банан қимматлайди

Эквадор Украинага қурол-яроғлар етказиб беришини эълон қилгач Россия уларга қарши банан урушини бошлади.

Росселхознадзор Эквадор қишлоқ хўжалиги вазирлигига мурожаат қилиб, 5 февралдан бошлаб Россияга банан етказаётган 5 та компаниянинг бананларига сертификат талаб қилди. Россия мурожаатида ёзилишича, гўёки Эквадордан етказилаётган бананларда хавфли ҳашарот топилган.

Бундай қарорга Россия Ташқи ишлар вазирлиги таҳдидлари ва Эквадорнинг АҚШга Россияда ишлаб чиқарилган ҳарбий техника ва қурол-яроғларни етказиб бериш қароридан сўнг келинган.

Эквадор дунё мамлакатларига асосий банан етказувчи ҳисобланади. Россиянинг бу қарори мамлакатда банан танқислиги ва унинг нархи кескин кўтарилиши олиб келиши мумкин.

Германияда наша қонунийлаштирилади

1 апрелдан бошлаб Германияда каннабис, яъни оддий наша қонунийлаштириши мумкин, ҳукумат бунга розилик берган.

Германиянинг коалицион ҳукумати каннабиснинг қисман легаллаштирилиши бўйича режалаштирилаётган лойиҳага оид турли қарама-қаршиликларни тартибга солишга муваффақ бўлган. Бу борада коалицион партиялар аъзолари хабар берган ва бу чора наркосиёсат соҳасида янги босқич бўлишини таъкидлашган.

Қонун лойиҳасига кўра, Германияда наша экиш, сақлаш ва ўтказиш қисман легаллаштирилади. Назарда тутилишича, Германиядаги марихуана истеъмолчилари ортиқ жиноий жавобгарликка тортилмайди, қорабозор билан эса самарали кураш олиб борилади.