Дунёда энг кўп ёмғир ёғадиган шаҳарлар рейтинги

Ёмғир бутун дунё бўйлаб миллионлаб одамларнинг ҳаётига таъсир қилади, аммо айрим жойларда у деярли ҳеч қачон тўхтамайди. Янги иқлимий маълумотлар йил давомида ёғингарчилик энг кўп кузатиладиган ўнта шаҳарни ажратиб кўрсатади, бу кўрсаткич ёмғирли кунлар сони билан ўлчанади.

Фото: DELFI / Šarūnas Mažeika

Ушбу рейтингга кўра, рўйхатда экватор ва тропик ҳудудларда жойлашган шаҳарлар устунлик қилади: айнан шу ерларда география ва атмосфера айланиши деярли ҳар куни ёғингарчилик келтириб чиқаради. Бу кўрсаткичлар дунё бўйлаб минглаб нуқталарда ёғингарчилик тақсимотини кузатиб борадиган мустақил иқлимий маълумотлар билан ҳам мос келади.

Буэнавентура, Колумбия — 258 ёмғирли кун.
Рўйхатга Колумбиянинг Тинч океани соҳилидаги порт шаҳри — Буэнавентура бошчилик қилади. Маҳаллий аҳоли йилда тахминан 258 кун ёмғирга дуч келади. Бундай кўп ёғингарчилик тропик иқлим, Тинч океандан келадиган нам ҳаво оқимлари, шунингдек, яқин атрофдаги тоғлар билан изоҳланади: тоғлар нам ҳавони юқорига кўтарилишга мажбур қилади ва у ерда у конденсацияланиб ёғингарчиликка айланади.

Колумбиянинг ўзи ҳам дунёдаги энг нам мамлакатлардан бири ҳисобланади: экваторга яқин жойлашуви ва релъефининг турфа-хиллиги сабабли бу ерда йиллик ёғингарчилик миқдори сайёра бўйича энг юқори кўрсаткичлардан бирига етади.

Манисалес, Колумбия — 257 ёмғирли кун.
Кейинги ўринда Манисалес туради — қаҳваси ва салқин тоғли иқлими билан танилган яна бир Колумбия шаҳри. У Анд тоғлари ёнбағрида жойлашгани сабабли бу ерда доимий булутлилик ва ёғингарчилик сақланиб туради — йилда тахминан 257 кун ёмғирли бўлади.

Сан-Вито, Коста-Рика ва Кито, Эквадор — ҳар бири 253 кундан.
Кейинги ўринларни Коста-Рика ва Эквадор шаҳарлари эгаллайди. Коста-Рика жанубидаги Сан-Вито ҳамда Эквадор пойтахти Кито (Анд баланд тоғларида жойлашган) ўртача йилда 253 тадан ёмғирли кунга эга. Бу ҳудудларда муҳим омиллар — тропиклараро конвергенция зонаси ва маҳаллий тоғ микроиқлимлари бўлиб, улар деярли бутун йил давомида ёғингарчиликни қўллаб-қувватлайди.

Санголки, Эквадор — 245 ёмғирли кун.
Китодан унча узоқ бўлмаган Санголки — Анддаги яна бир манзил бўлиб, бу ерда нам шароит одатий ҳол. Йилда тахминан 245 ёмғирли кун экваторга яқин тоғли минтақаларда кучли ёғингарчилик умумий тенденция эканини кўрсатади.

Экваториал Гвинея, Эквадор, Индонезия — ҳар бири 244 кундан.
Учинчи гуруҳда 244 ёмғирли кун кўрсаткичига эга учта ҳудуд (шаҳарлар) келтирилади: Экваториал Гвинеядаги Ниэфанг ва Микомесенг, Эквадордаги Банос ҳамда Индонезиядаги Тимику. Уларнинг барчаси экватор атрофидаги тропик ёмғир ўрмонлари ҳудудида жойлашган бўлиб, кучли қуёш иссиқлиги ва намликнинг йиғилиши (конвергенцияси) туфайли йилнинг катта қисмида деярли ҳар куни жала ва момақалдироқ кузатилади.

Дуала, Камерун — 243 ёмғирли кун.
Ўнликни Африкадаги Камеруннинг Дуала порт шаҳри якунлайди. Бу ерда ўртача йилда 243 кун ёмғир кузатилади. Гвинея кўрфазида жойлашган шаҳарга Атлантика океанидан келадиган нам ҳаво ва мавсумий муссон шамоллари кучли, кўпинча жала шаклидаги ёғингарчилик олиб келади.

Ёмғир дунё бўйлаб бир текис тақсимланмаган. Жанубий Америка, Африка ва Жануби-Шарқий Осиёдан ўтувчи экваториал камар умуман олганда энг кўп ёғингарчилик зонаси ҳисобланади.