Ниццадаги теракт иши бўйича айбланувчилар 18 йилга қамалди

Парижда 13 декабрь, сешанба куни 2016 йил июлида Ниццадаги теракт бўйича суд жараёни ниҳоясига етди, ўшанда ушбу ҳодиса оқибатида юзлаб одамлар жабрланганди. Саккиз нафар айбланувчи турли муддатларга қамоқ жазосига ҳукм қилинди, энг кўпи - 18 йил.

Судга келганлар ҳужумни амалга оширишда у ёки бу тарзда ёрдам берганликда айбдор деб топилди. Икки айбланувчи террористик ташкилотда қатнашгани учун 18 йил қамоқ жазосига ҳукм қилинди. Суд улар жиноятчига унинг режалари ва радикал қарашлари ҳақида билган ҳолда, юк машинасини ижарага олиш ва қурол олишга ёрдам берганини исботланган деб ҳисоблади - бу уларнинг телефон суҳбатлари ва ёзишмалари стенограммасидан далолат беради.

Яна бир судланувчи ҳайдовчига тўппончани сотганини тан олди, жиноятчи ўша тўппонча билан машинада одамларга келиб урилганидан кейин полицияга ўқ узган. 12 йиллик қамоқ жазосига ҳукм қилинган айбланувчи, харидорнинг теракт содир этиш режалари ҳақида билмаганини даъво қилди.

Бундан ташқари, жараёнда беш нафар айбланувчи қурол савдоси иштирокчиси деб топилиб, улар икки йилдан саккиз йилгача муддатга озодликдан маҳрум этилди.

2016 йил июль ойида 19 тонналик юк машинаси миллий байрам – Бастилияни қўлга олиш кунини нишонлаш учун Ницца қирғоғида йиғилган оломонга юқори тезликда келиб урилди. Натижада 86 киши ҳалок бўлди, бир неча юз киши жароҳат олди. Машина бошқараётган 31 ёшли Тунис фуқароси полиция томонидан отиб ўлдирилган. Кейинчалик маълум бўлишича, у психолог қабулида бўлган ва ҳужумни бир неча ҳафта давомида режалаштирган.

Ҳужум учун масъулиятни ИШИД гуруҳи ўз зиммасига олди, бироқ тергов у ва ҳайдовчи ўртасида ҳеч қандай алоқани аниқламади, хулосага кўра, аввалроқ оиладаги зўравонлик ва майда жиноятлар учун судланган эркак ИШИД таъсирисиз радикалга айланган.