Таиландда поезд устига қурилиш крани қулади: ўнлаб қурбонлар бор

Авария маҳаллий вақт билан соат 09:00 атрофида (Тошкент вақти билан соат 05:00) Накхонратчасима провинциясида, пойтахт Бангкокдан 230 км шимоли-шарқдаги Сикхио округида рўй берган.

Накхонратчасима полицияси бошлиғи Татчапон Чиннавонгнинг хабар беришича, тезюрар темирйўл линиясида қурилиш ишлари олиб борилаётган вақтда пойтахтдан Убонратчатхани провинциясига кетаётган поезд устига қурилиш крани тушиб кетган.

Транспорт вазири Пхипхат Ратчакитпракарн поездда жами 195 нафар йўловчи бўлганини маълум қилган. Унинг сўзларига кўра, кран зарбасини қабул қилган уч вагондан иккитасидаги йўловчилар ҳалок бўлган.

Полициядагилар BBC мухбирига қурбонлар сони 28 нафар эканини тасдиқлаган. Кран силжий бошлагани сабабли пачоқланган вагонлардан жасадларни олиб чиқиш мураккаблашди, дейди полиция бошлиғи.

Таиланд соғлиқни сақлаш вазирлиги маълумотига кўра, ҳозирга келиб барча йўловчилар, жумладан жароҳатланганлар ҳам воқеа жойидан эвакуация қилинган.

Қарийб 80 нафарни ташкил этувчи жабрланувчиларнинг энг кичиги – бир ёшда, энг кексаси – 59 ёшда, дея хабар берган BBC Thai мухбирига Сикхио шифохонаси ходими.

Поезд устига қулаган кран мавжуд темирйўл линияси ўрнида қурилаётган тезюрар темирйўл лойиҳаси бўйича ишлаётганди.

Таиланд давлат темирйўллари раҳбари авария сабабларини «пухта ва ҳар томонлама» текшириш учун чақирилди, деди бош вазир ўринбосари ва транспорт вазири Пхипхат Ратчакитпракарн.

Воқеа жойида бўлган маҳаллий аҳоли вакили Митр Интрипанянинг AFP агентлиги билан суҳбатда кучли шовқинни эшитгани, шундан сўнг иккита портлаш содир бўлганини айтиб берган.

«Мен нима бўлганини кўриш учун борганимда, йўловчи поезди устида ётган кранни кўрдим. Краннинг металл қисми иккинчи вагоннинг ўртасига урилиб, уни иккига бўлиб юборганди», – дейди у AFP’га.

Поезд ишчиси Тҳирасак Вонгсунгнерн маҳаллий Thairath Online нашрига хабар беришича, поезд учта вагондан таркиб топган. Биринчи вагонга зарар етмаган, қолган иккитаси эса жиддий шикастланган.

У поезд авария содир бўлганида 120 км/соат тезликда ҳаракатланганини айтган. Кран қулаганида у ва бошқа йўловчилар ҳавога учиб кетган.

Тҳирасак дарҳол йўловчиларга ёрдамга ошиққани, аммо олов ичида қолган иккинчи вагонга кира олмаганини айтган.

Таиланддаги қурилиш майдонларида ўлим ҳолатлари кам учрайдиган ҳодиса эмас, бунга стандартлар ва меъёрларга риоя қилиш устидан назоратнинг заифлиги ҳам сабабдир.

Ўтган йили Бангкокда содир бўлган зилзиладан сўнг кўп қаватли иншоот қулаб тушиши оқибатида 100 дан ортиқ одам ҳалок бўлган ва бу фожиа соҳадаги узоқ йиллик муаммоларни ўртага чиқарганди.

Ишчиларга компенсация тўлаш жамғармасининг 2022 йилги тадқиқотига кўра, ўтган йили ушбу мамлакатда 4,5 мингдан ортиқ ишчи қурилишдаги бахтсиз ҳодисалар оқибатида ҳалок бўлган ёки жароҳатланган.