Францияда Луврни тунашда гумонланувчилар қўлга олинди

Франция ҳукумати бир ҳафта олдин Луврни қўпол равишда талон-торож қилишда гумон қилинган икки кишини ҳибсга олган. Аввалига бу ҳақда маҳаллий ОАВ хабар берди, кейин Париж прокуратураси буни тасдиқлади, аммо қўлга олинганлар сони расман очиқланмаяпти.

Маълум қилинишича, гумонланувчилардан бири шанба куни кечқурун соат 22:00 атрофида «Париж – Шарл-де-Голл» аэропортида самолётга ўтириб, хорижга учмоқчи бўлганида қўлга олинган. Иккинчиси кўп ўтмай Париж чеккасида қўлга тушган.

Parisien хабарига кўра, ушбу шахслар Париж чеккасидаги Сен-Сен-Дени шаҳарчасида яшаган. Қайд этилишича, улар олдиндан полиция рўйхатида бўлган.

Уларнинг шахсияти ҳақида ҳозирча ҳеч нарса маълум эмас. AFP манбасига кўра, эркаклардан бири Жазоирга учаётган самолётга чиқмоқчи бўлган.

Луврнинг талон-торож қилиниши ўтган якшанба куни содир бўлганди – куппа-кундузи дунёнинг энг кўп ташриф буюриладиган музейидан 88 миллион евролик (100 миллион доллардан ортиқ) тарихий бойликлар ўғирлаб кетилганди.

Франция адлия вазири хавфсизлик протоколлари «ишламагани» ва бу мамлакатга катта зарар етказганини тан олди.

Париж прокурори Лора Беккуа ҳам гумондорлар қўлга олингани ҳақидаги хабарларни тасдиқлади, бироқ тергов маълумотлари жамоатчиликка барвақт маълум бўлганидан афсусдалигини билдирди.

«Терговчилар 2025 йил 25 октябр, шанба куни кечқурун, Лувр талон-торож қилинганидан бир ҳафта ўтганида ҳибсга олишни амалга оширганини тасдиқлайман. Ҳибсга олинган эркаклардан бири мамлакатни тарк этишга тайёргарлик кўраётган бўлган», – дейилади BBC сўровига жавобан келиб тушган баёнотда. Унда қўлга олинганлар сони келтирилмаган.

«Тергов манфаатларини ҳисобга олмаган ҳолда бу маълумотларни ошкор қилганимдан жуда афсусдаман. Бу ўғирланган қимматбаҳо буюмларни ҳам, барча жиноятчиларни ҳам қидиришда иштирок этаётган юзлаб терговчиларнинг ишларига фақат зарар етказиши мумкин. Қўшимча тафсилотлар беришга ҳали эрта. Гумонланувчиларни сўроқ қилиш якунида (96 соатгача давом этиши мумкин) қўшимча маълумот бераман», – дея қўшимча қилди прокурор.

Луврдаги ўғирлик ўтган якшанба куни содир бўлганди. Жиноятчилар зинапоя ёрдамида музей биносидаги дераза олдига чиқиб, ойна ва ромни кесиб, ичкарига киришган.

Улар қимматбаҳо буюмлар солинган металл шкафларни очиб, кейин скутерларда ғойиб бўлишганди. Талончилик саккиз дақиқадан камроқ давом этган.

Талончиликда ниқоб таққан тўрт киши иштирок этган (улардан икки нафари бинога кирган). Терговчилар фикрича, улар профессионал жиноятчилар бўлишган, чунки улар пухта ўйланган режа асосида ҳаракат қилишган ва айнан қайси қимматбаҳо буюмларни олиб кетишни аниқ билишган.

Чоршанба куни прокурор Лаура Беккуа RTL радиостанциясига ўғирланган қимматбаҳо буюмлар 88 миллион еврога (тахминан 102 миллион доллар) баҳоланаётганини айтди.

«Шуни ёдда тутиш керакки, бу иқтисодий зарар, аммо ўғирлик тарихий меросга етказган зарар олдида ҳеч нарса эмас», – деди у.

Луврдан ўғирланган буюмлар орасида императорлар Наполеон Бонапарт ва Луи Бонапарт ўз рафиқаларига совға қилган олмосли тақинчоқлар ҳам бор эди.

Айрим экспертлар фикрича, талончилар катта эҳтимол билан, аллақачон тақинчоқларни қисмларга ажратишган, яъни улардан олмосларни ажратиб олишган ва қимматбаҳо металларни қайта эритиб, уларнинг қийматининг кичик қисмига тарихий артефакт сифатида сотиб юборишган.

Расмийларга кўра, талончилар саккизта буюмни, жумладан, диадемалар, маржонлар, зираклар ва тўғноғичларни ўғирлашган. Уларнинг барчаси XIX асрга мансуб бўлиб, бир вақтлар француз қироллик ва императорлик хонадонлари аъзоларига тегишли бўлган.

Яна иккита буюм, жумладан, императрица Евгениянинг тожи жиноят жойи яқинидан топилган – афтидан, ўғрилар уларни ташлаб кетишган ёки қочиш пайтида йўқотиб қўйишган.