Трамп Европа етакчилари билан Украина юзасидан кескин баҳслашганини айтди

АҚШ президенти Доналд Трампнинг сўзларига кўра, Украина тарафдори бўлган Европа иттифоқчилари билан телефон орқали мулоқот чоғида оғзаки тортишув рўй берган. Чоршанба, 10 декабр куни журналистлар билан суҳбатда у Германия канцлери Фридрих Мерц, Буюк Британия бош вазири Кир Стармер ва Франция президенти Эммануэл Макрон билан бўлган суҳбати ҳақида гапирар экан, шундай деди: «Биз Украина масаласини анча кескин сўзлар билан муҳокама қилдик».

«Менимча, бизда айрим шахслар юзасидан кичик келишмовчиликлар бўлди. Ва биз: “Учрашишдан олдин, бунинг нималарга олиб келишини кутайлик”, дедик», — деб тушунтирди Оқ уй раҳбари. Доналд Трамп «кескин сўзлар» деганда нима назарда тутганини аниқлаштирмади.

Трампнинг сўзларига кўра, Европа раҳбарлари ҳафта охирида Европада Украинага бағишланган учрашув ўтказмоқчи бўлиб, унда АҚШ вакиллари ҳам иштирок этишини истаган. Унда Украина президенти Володимир Зеленский ҳам қатнашиши кутилмоқда.

«Биз қарорни улар нима билан қайтиб келишига қараб қабул қиламиз. Биз вақтни бефойда сарф қилишни истамаймиз», — дея урғу берди АҚШ президенти.

У яна бир бор Зеленскийни Украинада сайлов эълон қилишга ва Россия билан тинчлик битими имзолашга чақирди. «Зеленский реалист бўлиши керак», — деди Доналд Трамп.

Оқ уй раҳбари сўнгги кунларда Украина президентини кескин танқид қилган ҳамда уни ҳозирги ҳарбий қонунчиликка кўра ўтказиб бўлмайдиган президентлик сайловларини ўтказишга чақирган эди.

Володимир Зеленский эса Трамп танқидидан сўнг, принципиал жиҳатдан президентлик сайловларига тайёрлигини, лекин уларни ўтказиш учун аввал икки масалани ҳал этиш кераклигини айтди.

Биринчи — АҚШ маъмурияти ва Европа ҳамкорлари сайловлар хавфсизлигини таъминлаб бериши лозим. Иккинчиси — халқ иродасининг легитимлиги учун зарур бўлган қонуний асосни яратиш. Зеленскийнинг сўзларига кўра, у Олий рада депутатларидан ҳарбий ҳолат шароитида сайлов ўтказиш имкониятини кўриб чиқадиган ҳуқуқий асос ва сайлов тўғрисидаги қонундаги ўзгартишлар бўйича қонун лойиҳаларини тайёрлашни сўрайди.