Сенат ялпи мажлиси ўз ишини бошлади

Ўзбекистон Республикаси Сенатининг навбатдаги, XIII ялпи мажлиси ўз ишини бошлади.

Мажлисни расмий маъруза билан Сенат раиси Ниғматулла Йўлдошев бошлаб берган. Раис ўз нутқида тугалланиб бораётган жорий йилда амалга оширилган ишларни сарҳисоб қилиб, айрим сенаторларнинг фаолиятини танқид қилиб ўтди. 

Унинг таъкидлашича, «айрим сенаторларнинг узвий, доимий ва самарали иш фаолиятини йўлга қўймагани» билан боғлиқ ҳолатлар ҳанузгача учраб турибди. Шунингдек, сенаторлар жойлардаги «долзарб масалаларни Сенат муҳокамасига киритиб боришда фаол ташаббус билдирмаяпти».

Мажлис кун тартибига қатор қонунларни кўриб чиқиш, уларга ўзгартиш ва қўшимчалар киритиш режалаштирилган. Жумладан, «Солиқ ва бюджет сиёсатининг 2018 йилга мўлжалланган асосий йўналишлари қабул қилингани муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида» Ўзбекистон Республикаси Қонуни, «Ўзбекистон Республикасининг Мудофаа доктринаси тўғрисида»ги қонун, «Ўзбекистон Республикасининг Иқтисодий процессуал кодексини тасдиқлаш тўғрисида»ги қонунларни кўриб чиқиш белгиланган.

Сенаторлар шунингдек, «Ўзбекистон Республикаси темир йўл транспорти ходимлари кунини белгилаш тўғрисида»ги қонун, «Ўзбекистон Республикаси қурилиш соҳаси ходимлари кунини белгилаш тўғрисида»ги қонун ҳамда «Келажак бунёдкори» медалини таъсис этиш тўғрисида»ги Ўзбекистон Республикасининг Қонунини кўриб чиқишлари кутилмоқда.

Сенат ялпи мажлисида Ўзбекистон Республикаси ички ишлар вазирининг ички ишлар органларининг жиноятчиликка қарши курашиш ва ҳуқуқбузарликлар профилактикаси соҳасидаги фаолияти тўғрисидаги ахбороти тингланади.

Бундан ташқари, 2018 йилда фермер хўжаликларини босқичма-босқич кўп тармоқли фермер хўжаликларига айлантириш бўйича дастур кўриб чиқилади.