2020 йил давомида бюджет ташкилотлари ходимларининг иш ҳақи, пенсия, стипендия ва нафақалар миқдори инфляция даражасидан юқори миқдорда оширилади.
Бу ҳақда президент Шавкат Мирзиёев парламентга мурожаатида айтиб ўтди.
Ўзбекистонда 2020 йил учун инфляциянинг базавий прогнози 12 - 13,5 фоиз даражасида белгиланган. 1 февралдан иш ҳақи ва пенсиялар 7 фоизга ошади.
Давлат раҳбарининг маълум қилишича, фуқаролар пенсияга чиқиши учун фақат паспорти билан бориб, мурожаат қилиши кифоя бўладиган тизим яратилади. Бунинг учун давлат архиви тизими электрон шаклга ўтказилиши керак.
Президент нафақа тайинлашдаги мезонларни қайта кўриб чиқиб, уларни белгилашда очиқ ва адолатли тизим яратиш зарурлигини ҳам қайд этди.
«Нафақа тайинлашда маҳалланинг иштирокини танқидий қайта кўриб чиқиш лозим. Умуман олганда, аҳоли ижтимоий нафақа бўйича битта идорага мурожаат қилганидан кейин ўша идоранинг ўзи бир кунда ҳамма ҳужжатларни тайёрлаб, масаланинг ечимини топиши керак», – деди Шавкат Мирзиёев.
