Toyota Corolla Cross, Cadillac Escalade IQ ва Zeekr 001 FR – ҳафта технодайжести

iPhone 15 Pro 2 ТБ хотирага эга бўлиши мумкин

Apple компанияси биринчилардан бўлиб 2 терабайт ички хотирага эга смартфонни сотувга чиқармоқчи. Сентябрда тақдимоти кутилаётган iPhone 15 Pro вa 15 Pro Max смартфонларининг максимал конфигурацияси 2 ТБ хотирага эга бўлади, деб хабар бермоқда инсайдерлар. Элатиб ўтамиз, iPhone 14 Pro ва 14 Prо Мах смартфонлари 1 терабайт ички хотирага эга эди.

iPhone 15 Pro вa 15 Pro Max энг кичик 256 ГБ хотира билан таъминланади, базавий iPhone 15 va 15 Plus’да энг кам хотира 128 ГБ бўлади.

Toyota Corolla Cross

Toyota компанияси Хитойда гибрид кроссовер – Toyota Corolla Cross’ни тақдим этди. Бунгача ушбу моделнинг фақат бензинда ҳаракатланадиган версияси ишлаб чиқарилар эди.

Corolla Cross 2 литр ҳажмли бензинда ҳаракатланадиган двигатель билан жиҳозланган, ўз навбатида у электромотор билан ҳамкорликда ишлайди. Двигателлар жами 195 от кучини беради. Кроссовер 100 км масофага 4,56 литр бензин сарф қилиши қайд этилган.

Машинанинг узунлиги 4460 мм, эни 1825 мм, бўйи 1620 ммни, ғилдираклар базаси эса 2640 ммни ташкил қилади. Юкхона сиғими эса 427 литрни ташкил этади.

Автомобиль харидорларга 6 хил комплектацияда тақдим қилинади. Базавий версия учун 19,5 минг доллар нарх белгиланган. Топ комплектация учун 25,9 минг доллар тўлаш керак бўлади.

Топ версия теридан ишлов берилган салон, 10,25 дюймли медиатизимни бошқариш дисплейи билан таъминланган. Шунингдек, Apple CarPlay ва Huawei HiCar каби интерфейсларни қўллаб-қувватлайди. Бундан ташқари, унда Т-Pilot ва Toyota Connect каби қулайликлар ҳам жорий этилган.

Gmail’да автоматик таржима хизмати

Gmail электрон почтанинг ўзида амалга ошириладиган таржима хизматини ишга туширади. Шу пайтгача фойдаланувчилар электрон почтага юборилган матнларни нусхалаши ва Google Translate'га жойлаштириши керак эди.

Янги тизимнинг ишлаш жараёни оддий, Gmail автоматик равишда электрон почта тилини аниқлайди ва имкон қадар сифатли таржимани таклиф қилади. Ҳозирда илова Gmail'нинг иш столи версиясида мавжуд бўлган 100 та тилда ишлашга мослаштирилган.

Zeekr 001 FR

Geely компанияси Zeekr 001 FR электромобилини тақдим қилди. Моделнинг интерьери янгиланган дизайнда, ташқи кўриниши ҳам бироз ўзгарган. Бироқ автомобиль стандарт лифтбэк Zeekr 001’нинг умумий дизайнини ўзида сақлаб қолган. 

Олд бампер ўзгаришларга учраган. Қизил спойлердан фойдаланилган. Компания ушбу модели орқали Tesla’нинг Model S Plaid’ига рақобатчи бўлишни кўзлаган.

Zeekr 001 FR янги дастурий таъминот билан таъминланган. Бироқ ҳозирча электромобилнинг бошқа хусусиятлари, имкониятлари маълум қилинмади. Стандарт Zeekr 001 554 от кучига эга двигатель билан ҳаракатланади. 

Компания, шунингдек, 001 FR — моделнинг махсус версияси эканлигини таъкидлаб, нархи 138 700 доллардан бошланишини эълон қилди. Cерияли ишлаб чиқарилиш қачондан бошланиши ҳозирча номаълум.

Эслатиб ўтамиз, яқинда Европада нархи 55 940 евродан бошланадиган Zeekr 001 учун сотувлар очилганди. Уни серияли ишлаб чиқариш ҳам бошланган. 

Instagram’да бегона хабарларни чеклаш

Instagram платформаси бегоналардан келадиган хабарларга чекловлар ўрнатади. Бундан кейин кузатувчи бўлмаганлар чексиз хабарлар, расм ёки видеолар юбора олмайди, фақат биттагина хабар жўната олади. Ёзишмаларни давом эттириш эса иккинчи томон суҳбатга таклифни қабул қилгандан кейингина мумкин бўлади.

Таъкидлашича, ушбу янги чекловлар билан фойдаланувчи ўзи кузатмайдиган бошқа фойдаланувчидан кераксиз суратлар ёки видеоларни қабул қилмайди ва бегоналарнинг уларга қайта-қайта хабар юборишини чеклаб қўя олади. Янги функция аёллар учун кўпроқ фойдали бўлиши кутилмоқда.

Cadillac Escalade IQ

Cadillac Escalade IQ йўлтанламаси тақдим этилди. У тўла қувват билан 724 км масофа босиб ўтади. Электройўлтанламас двигателлари жами 761 от кучини беришга қодир, 100 км тезликка чиқиши учун эса 5 сония кифоя қилади.

Сотувлар бошланиши 2024 йилга мўлжалланган, автомобиль нархи 130 минг доллардан бошланади.

Virgin Galactic дастлабки сайёҳларни космос чеккасига олиб чиқди

Миллиардер Ричард Брэнсон асос солган Virgin Galactic космик компанияси сайёҳлардан иборат биринчи экипажини коинот чеккасига муваффақиятли етказди ва уларни Ерга қайтарди.

SpaceShipTwo (VSS Unity) бошқариладиган космик кемаси Нью-Мексикодаги «Америка» космодромидан ҳавога кўтарилган WhiteKnightTwo эгизак корпусли кучайтирувчи самолётдан учирилди. Космолетнинг ташувчидан чиқарилиши 15 км баландликда амалга оширилди, шундан сўнг у тахминан 88 км баландликка кўтарилди, бу ерда вазнсизлик бошланади. Парвоз давомийлиги 45 дақиқани ташкил қилди. 

Бортда олти киши - Virgin Galactic бош астронавтлар йўриқчиси Бет Мозес, қўмондон Си Жей Старкоу, учувчи Келли Латимер ва уч сайёҳ - Паркинсон касаллигидан азият чеккан 80 ёшли собиқ британиялик спортчи Жон Гудвин, Кейша Шахафф ва унинг қизи Анастейша Майерс бўлган. Сўнгги иккиси Антигуа ва Барбудадан бўлиб, хайрия лотереясида учиш ҳуқуқини қўлга киритган.