Украинада Савченко томонидан режалаштирилган теракт ҳақида янги маълумот берилди

Олий радада депутат Надежда Савченко ва «Офицерский корпус» асирларни озод этиш маркази раҳбари Владимир Рубан томонидан содир этилиши режалаштирилган теракт мутахассислар томонидан махсус полигонда тикланди. Бу ҳақда мамлакат бош ҳарбий прокурори Анатолий Матиос Радио НВ эфирида айтиб ўтди.

«Кеча биз ҳодисаларни тиклаш бўйича махсус экспертлик ишини амалга оширдик. Шуни айтишим мумкинки, гумонланувчи Рубан ва гумонланувчи Савченко томонидан олиб келинган миномётлар, дастлаб миномётлардан алоҳида тарзда олиб келинган миналар кеча полигонда режалаштирилган траекторияда синовдан ўтказилди», - дея айтиб ўтди Матиос.

Унинг сўзларига кўра, Олий радани Киевдаги Труханов ороли ҳудудидан ўққа тутиш модели ҳам яратилган.

«Хуллас, бу ишлатишга яроқли миномётлар бўлган, улардан ўт очиш ва керакли жойни нишонга олишда фойдаланиш мумкин», - дея хулоса қилган у.

Эслатиб ўтамиз, аввалроқ Надежда Савченко адвокатлар хизматидан бош тортгани хабар берилганди.