Россия ва Украина ЗАЭС атрофида маҳаллий ўт очишни тўхтатиш бўйича келишиб олди

АЭХА воситачилигида Россия ва Украина Запорижжя АЭС ҳудудида ўт очишни маҳаллий даражада тўхтатишга келишиб олди — бу охирги қолган захира электр узатиш линияси (ЭУЛ)ни таъмирлашни ўтказиш учун зарур.

Фото: LIBKOS/AP/picture alliance

Россия ва Украина Атом энергияси халқаро агентлиги (АЭХА) воситачилигида Запорижжя атом электр станцияси (ЗАЭС) атрофида маҳаллий ўт очишни тўхтатишга келишиб олди. Бу қарор охирги қолган захира электр узатиш линиясини таъмирлаш ишларини бошлаш учун қабул қилинган. Бу ҳақда АЭХА раҳбари Рафаэл Гросси жума куни, 16 январда маълум қилди.

“Украина электр тармоқлари операторининг техник мутахассислари яқин кунларда 330 кВ линиясида таъмирлаш ишларини бошлаши кутилмоқда. Ушбу линия 2 январ куни ҳарбий ҳаракатлар оқибатида шикастланган ва электр тармоғидан узилган”, — дейилади хабарда.

Қайд этилишича, АЭХА вакиллари аллақачон Вена шаҳрини тарк этган ва фронт чизиғи яқинидаги таъмирлаш ишларини кузатиб бориш учун йўл олган. Гросси эслатишича, ЗАЭС атрофидаги бундай маҳаллий ўт очишни тўхтатиш ҳисоб бўйича тўртинчиси. Унинг сўзларига кўра, бу АЭХАнинг муҳим ролини намоён этади.

РФнинг Украина энергетика инфратузилмасига қарши давом этаётган ҳужумлари шароитида АЭХА ядровий хавфсизлик учун ўта муҳим бўлган Украинадаги ўнта электр подстанциясини инспекция қилиш мақсадида навбатдаги эксперт миссиясини тайёрламоқда, деб хабар қилди Гросси.

Пресс-релизда аниқлаштирилишича, бу подстанциялар реакторларни совитиш тизимлари ҳамда ядровий хавфсизликнинг бошқа муҳим функциялари учун зарур бўлган электр энергиясини ишлаб чиқариш/таъминлашда катта аҳамиятга эга.

Запорижжя АЭС — Европадаги энг йирик атом станцияси. Унинг таркибида умумий қуввати 6000 МВт бўлган олтита энергоблок мавжуд. Станция Энергодар шаҳри яқинида, суви пасайиб кетган Каховка сув омборининг жанубий соҳилида жойлашган. Россия Запорижжя АЭСни 2022 йил март ойида, Украинадаги уруш бошланганидан кўп ўтмай, эгаллаб олган ва уни “Росэнергоатом” АЖ бошқарувига топширган.

ЗАЭСдаги барча реакторлар тўхтатилган, бироқ улар доимий совитишни талаб қилади. Совитиш тизимига электр ташқи тармоқдан узатилади. Агар электр таъминоти узилиб қолса, таъминотни дизел генераторлар таъминлайди. Уруш давомида станция бир неча бор ўққа тутилган, бу зарбаларда Россия ва Украина бир-бирини айблайди.

Урушдан кейин Запорижжя АЭСни ким бошқариши масаласи — АҚШ воситачилигида Украинада тинчликка эришиш йўллари муҳокама қилинаётган жараёндаги асосий саволлардан бири ҳисобланади.

Тайёрлаган: Отабек Матназаров

#Россия #Украина #ЗАЭС