Ўзбек пахтасига қўйилган глобал бойкот олиб ташланди — тантанали тадбирдан репортаж

{Yii::t(}

Ўтказиб юбориш 6s

Ўтказиб юбориш

Бандлик ва меҳнат муносабатлари вазирлигида ўтказилган пресс-брифингда Cotton Campaign халқаро коалицияси ўзбек пахтасини глобал бойкот қилиш чақириғи тугатилганини эълон қилди.

“Мен ва Cotton Сampaign жамоаси бу кунни қарийб 14 йил интизорлик билан кутдик. Ўзбекистондаги ҳаракатларимизнинг бошланиши тахминан 2007 йил ва 2008 йилнинг бошларига тўғри келади.

Биз Президент Мирзиёевнинг давлат томонидан меҳнатга мажбурлашни чеклаш борасидаги тарихий ислоҳотларни бошлаш ва уларни татбиқ этишдаги лидерлигини эътироф этамиз.

Мажбурий меҳнатни ҳар қачон ва ҳар қаерда кузатиб, қайд этиб боришда кўрсатган жасорат ва қатъиятлари билан барча фаолларни ва кузатувчиларни ҳам табриклаймиз.

Бу муваффақият барча ўзбеклар учун қадрли, бундан ташқари, бу муваффақият 21 асрда битта мамлакатнинг мажбурий меҳнатга қарши халқаро курашда қозонган ғалабаси ҳамдир. Бу миллий ва халқаро ғалаба бутун дунёни руҳлантира олади”, деди пресс-брифингда каолиция асосчиларидан бири Беннет Фриман.

“Cotton Сampaign” каолицияси координатори Ралука Думитреску Ўзбекистонда пахта саноати янги иш ўринларини яратишда йирик потенциалга эга эканини, фақат ишларни ташкил этишда пахта саноатида ишлаётган ишчиларнинг меҳнат ҳуқуқларини биринчи навбатда эътиборга олиш зарурлигини таъкидлади.

“Ўзбек пахта саноати жуда кўп иш ўринларини яратишга қодир йирик потенциалга эга. Биламизки, ҳар йили пахта йиғим теримининг ўзида 1,5 млн одам пахта теради. Бундан ташқари, 400 минг одам пахта етиштиришнинг турли босқичларида меҳнат қилади. Ва бу сектор ривожланиши билан унда банд бўлган одамлар сони ҳам ошади. Биз Ўзбекистоннинг текстил саноатидаги асосий манба бўла оладиган давлатлардан бирига айлана олиш потенциали борлигига ишонамиз”, дея қайд этди Ралука Думитреску.

Сенат Раиси, Одам савдосига ва мажбурий меҳнатга қарши курашиш Миллий комиссияси раиси Танзила Норбоеванинг қайд этишича, бойкотни бекор қилиш учун Ўзбекистон жуда кўп ҳаракат қилган. Бироқ ҳали яна қилинадиган ишлар ҳам кўп.

“300 дан ортиқ йирик брендлар Ўзбекистон пахтасини олишни чеклаганди. Бугун эса ҳамма халқаро брендлар учун Ўзбекистонга бозор очилди.

Албатта, айтганимиздек, ҳали яна кўплаб ишларни амалга оширишимиз зарур.

Биринчидан, ишлаб чиқаришдаги занжир: пахтани экишдан бошлаб то тайёр маҳсулотга етиб келгунча бўлган барча меҳнат стандартларини, энг асосийси, меҳнат ҳуқуқларини таъминлашимиз зарур. Бу ойлик масаласи, хавфсиз меҳнат шароити, ишчиларни эркин жалб қилиш каби кўплаб компонентлардан иборат.

Иккинчидан, қонунчиликни такомиллаштириб боришимиз зарур. Биз Халқаро Меҳнат Ташкилотининг 19 та конвенциясини ратификация қилдик, бироқ уларнинг 200 га яқин конвенциялари бор. Уларни ратификация қилиш билан бирга, биринчи навбатда, бажарилишини таъминлашимиз зарур.

Бундан ташқари, қишлоқ хўжалиги ва хусусий сектор тармоқларида меҳнат шароитларини таъминлашимиз зарур”, – деди Сенат раиси Танзила Норбоева.