Республика бўйича навбатчиликка чиққан ўқитувчиларга қўшимча ҳақ тўланади – манба

Kun.uz Бувайдадаги 37-мактабда расман ишланмайдиган кунларда ҳам 24 соатлик узлуксиз навбатчиликка жалб этилган педагоглар, бунга буйруқ бериб, шунинг ортидан ишдан бўшаган мактаб директори масаласини батафсил суриштиришга уринди. Мактабгача ва мактаб таълими вазирлиги матбуот хизмати таҳририятнинг бу борадаги саволларини бефарқ қолдирди.

Аммо Фарғона вилояти Мактабгача ва мактаб таълими бошқармасидаги манбаларга кўра, ишдан олингани айтилган Ҳасанбой Нишонов 37-мактабда анча йиллардан бери директор ўринбосари сифатида ишлаб келган. 2024 йил охирига келиб унга директорлик в.в.б. (вазифасини вақтинча бошқарувчиси) лавозими юклатилган.

Ўша йилда унинг ўрнига вақтинча ўринбосар сифатида Севара Ҳамдамова тайинлангани, навбатчилик билан боғлиқ воқеалар резонанси ортидан Нишонов ишдан олиниб, Ҳамдамова директор бўлгани маълум қилинди. Ҳасанбой Нишонов эса ҳозирда ўзининг асосий вазифаси – директор ўринбосарлигига қайтарилган.

“Маҳаллий ҳокимият ва вазирликдан чиқишган, “кимгадир чора кўрмасанг бўлмайди”, дейишганидан кейин, шуни кўрсатиш учун аслида ишдан ҳайдалмаган бўлса ҳам юклатилган ишидан озод қилинганини ишдан олинди деб умумий беришган”, – дейди манба.

Бироқ, Нишонов Gazeta.uz билан суҳбатда ишга ҳануз тикланмагани ҳақида гапириб берган. Унинг таъкидлашича, 6 январ куни вақтинча меҳнатга лаёқатсизлик таътилига чиққанида у ишдан бўшатилган. Бундан ўзи бехабар бўлган.

“15 январ куни касаллик таътили тугайди, кейин ишга қайтмоқчи эдим. Аммо “болничный”га чиққан куним ишдан бўшатилдим. Бу ҳақда ижтимоий тармоқлар орқали хабар топдим. Мен билан ҳеч ким суҳбатлашиб, огоҳлантирмади, ариза ва тушунтириш хати ҳам ёздириб олмади. Энг алам қиладигани шуки, мен ҳеч қандай айб иш қилмай туриб, тепанинг топшириғини бажариб, ўзим бехабар ишдан олиндим. Интернетда ишга тикланганим ҳақида хабарлар тарқаляпти. Аммо ишга тикланганим йўқ, бу ҳақда менга бирор ташкилотдан расмий жавоб айтилмади. Ишдан бўшатилганим тўғрисидаги буйруқни кеча, 8 январ куни қўлимга олдим. Ҳатто ўрнимга аёл киши вақтинча вазифа бажарувчи этиб тайинланибди”, — дейди собиқ мактаб директори в.в.б.

Навбатчилик учун тўлов

Kun.uz манбасига кўра, дам кунларида ишлашга мажбур қилинган ўқитувчиларнинг иш ҳақини 2 ҳисса қоплаб беришга оид Меҳнат инспекциясининг ёзма кўрсатмаси ижрога йўналтирилмоқда. Ҳужжат 8 январ санасида вазирликка келган ва унинг ижроси устида 9 январдан ишлаш бошланган.

Таҳририят ихтиёрига келиб тушган инспекция тақдимномасига кўра, республика бўйича навбатчиликка жалб қилинган барча ходимларга меҳнат қонунчилигида белгиланган миқдорларда иш ҳақлари тўлиқ тўлаб берилиши, қолаверса, вазирлик ҳамда унинг қуйи тизимларида:

• меҳнат ва меҳнатни муҳофаза қилиш соҳасида қонунбузилиш ҳолатларининг келиб чиқиш сабабларини ўрганиш ҳамда уларнинг келиб чиқишига имкон берувчи шарт-шароитларни бартараф этиш;
• педагог ходимларни меҳнат шартномаси ва лавозим мажбуриятларида белгиланган ишлардан ташқари ишларга уларнинг розилигисиз жалб қилмаслик;
• ушбу тақдимнома талабларини тизим ва тассаруфий ташкилотларига етказиш ҳамда меҳнат қонунчилигига риоя қилиш бўйича қатъий назоратни амалга ошириш қатъий сўралган.

Тақдимнома ижроси бўйича амалга оширилган ишлар юзасидан маълумотларни тасдиқловчи ҳужжатларни илова қилган ҳолда 2026 йил 16 январга қадар Давлат меҳнат инспекциясига ёзма ахборот бериш кераклиги ҳам ёзилган.

Манбанинг таъкидлашича, 20 йилдан бери тизимда ишлаётган бўлса, педагогларни мажбурий меҳнатга жалб қилганлик учун қўшимча ҳақи тўлаб берилмаган. “Бу тарихда биринчи марта бўлса керак”, – дейди у.

Аввалроқ Kun.uz навбатчиликка оид топшириқнинг келиб чиқиш нуқтаси Мактаб вазирлиги ва ҳукуматга боғланиши, бу ҳолат фақат Фарғонада эмас, балки бутун республикада кузатилган бўлиши мумкинлиги ҳақида ҳам ёзганди.