“Оила қуриш учун Хитойда ўқиш имкониятидан воз кечгандим” – Жанубий Кореяда грант ютган қиз ҳикояси

Шаҳодат Муродова “Микрофон қизларда” лойиҳасининг навбатдаги қаҳрамони бўлди.

Орзуларга бой ва машаққатли болалик

Жиззах вилоятиданман. Оилада икки қизмиз. Болалигим орзуларга тўла бўлган. Биринчи шифокор бўлишни, кейинроқ эса тележурналист бўлишни орзу қилганман. Адабиёт, шеъриятга муҳаббатим баланд эди.

Болалигим бироз қийин ўтган. Мен ҳали икки ёш пайтим дадам автоҳалокат туфайли вафот этган. Синглим ҳам бу пайти жуда кичик эди. Бизни отамнинг ота-онаси – бобо-бувим катта қилишган. Улар ёши каттароқ бўлгани ва ҳеч қаерда ишламаганликлари сабабли оиламизда моддий қийинчиликлар ҳам бўлиб турарди. Ўқишга боришим учун йўлкира топилмай қолган пайтлар ҳам бўлган. Бироқ бобо-бувимнинг (Аллоҳ раҳматига олсин) ўқишга муҳаббат қўйишимизда ҳиссалари жуда катта бўлган. Улар бизни ўқишга рағбатлантиришган, тезроқ турмушга бериб юбориш ҳақида эмас, аввало, илмли бўлиб йўлимизни топиб олишимиз ҳақида ўйлашган.

Ўрта таълимни тугатгач, Тошкентдаги Шарқшунослик университетининг Хитой тили филологияси факультетига ўқишга кирганман. Журналист бўлиш орзум ҳали ҳам қатъий эди, лекин абитуриент пайтим “Журналист бўлиш учун айнан журналистикада ўқиш шартмас, хорижий тилларни билиш, илмли бўлиш билан яхши журналистга айланиш мумкин”, деган гапни эшитганман ва айни шу факультетни танлаганман. Шартнома асосида ўқиганим сабабли дарсдан кейин контракт пулимни ишлаб топиш учун ўқув марказларида хитой тилидан дарс берардим.

“Хитойга кетиш имконидан воз кечганман...”

Ўқишни битириб Жиззахга қайтиб борганман, бу орада бўлажак турмуш ўртоғим Жанубий Кореяда магистратурани тугатиб, ишга жойлашиб оила қуриш учун Ўзбекистонга қайтиб келган. Facebook орқали мени кўриб, уйимизга совчи жўнатган ва учрашувда бир-биримизга маъқул бўлганмиз. Бироқ мен Хитойда ўқиш учун Конфуций грантини ютиб олгандим ва ўша пайтда ўқишга кетиш учун ҳужжат ишлари билан юргандим, визам ҳам тайёр бўлганди. Турмуш ўртоғим эса “Хитойга кетманг, Кореяга олиб кетаман, ўша ерда ўқийсиз, шароит қилиб бераман”, деганди. Ўша пайт олдимда иккита танлов қолган: Хитойда ўқиш орзум эди, грантим бор, буни танлайми ёки оилали бўлиб, Кореяда янги ҳаёт бошлашними деб иккиланганман ва оилани танлаб, тўйга розилик бердим.

Кореяда янги ҳаёт

Кореяга келгач, дастлаб, тил билмаганим учун анча пайт уйда ўтириб қолдим. Дўкондан нарса сотиб олишга ҳам қийналардим ҳатто. Янги муҳитга мослашишдаги қийинчиликлар сабаб стрессга тушдим, 2 йилча фарзандли ҳам бўлмадик. Ҳолатимни кўрган турмуш ўртоғим менга ўқишим кераклигини, ҳаммаси изига тушишини айтиб, ўзи уйда корейс тилини интенсив тарзда ўргатди. Шундан сўнг Кореяда машҳур бўлган грант дастури – GKS (Global Korea Scholarship)га ҳужжат топширдим ва интервьюларни корейс тилида топширганим ҳам қўл келиб, грант ютиб олдим. Бу грант дастури ўқишнинг барча харажатларини қоплайди, бундан ташқари, ойига 900-1000 доллар атрофида стипендия берилади, суғурта пуллари қоплаб берилади.

Айни грант ғолиби бўлганим аниқ бўлган пайти фарзанд кутаётганимизни ҳам билгандик. Грант талабларида ҳомиладорлар, ёш болалилар ўқиши мумкин эмас дейилган қоида бор эди. Лекин бахтимга мен ҳужжат топширган йили айни шу қоида чиқариб ташланган экан.

Лекин мен топширган таълим дастури қоидасига кўра, магистратурада ўқиш бошланишидан олдин талаба Кореянинг қайсидир шаҳрига бир йиллик тил курси таълими учун жўнатилади. Мен ҳам магистратурам Сеул шаҳрида бўлса-да, тил курси таълими учун бошқа шаҳарга боришимга тўғри келган. Турмуш ўртоғим эса Сеул шаҳрида ишлайди.

Қизимиз туғилганда ҳам турмуш ўртоғим билан алоҳида яшардик, унинг чилласи чиқиши биланоқ ўқишимни давом эттириш учун боғча излашга тушганмиз. Ҳар куни эрталаб тонгдаёқ қизимни боғчага қолдирардим. Туш вақтигача ўқиш, сўнг қизимни олиб уйга қайтардим. Дарсларимни қизим ухлаган пайти тайёрлардим. Турмуш ўртоғим эса фақат дам олиш куни ёнимизга кела оларди. Шу тарзда мен тил курсини тугатгунимгача қизим 5-6 ойлик бўлиб қолди. Ҳозир яна Сеулда биргаликда яшаяпмиз.

Магистратурани Сукмён аёллар университетида сиёсатшунослик ва халқаро муносабатлар факультетида ўқияпман.

Тил ўрганиш

Ҳозиргача жами 4 та тилни: корейс, хитой, инглиз ва рус тилларини биламан.

Тил ўрганиш учун алоҳида техникани тавсия қилолмайман, лекин ўз она тилини яхши билган ва хотираси устида ишлаган одамга тил ўрганиш анча осон бўлади.

Кореядаги ҳаёт

Кореяда ёш она учун шароитлар яхшилиги сабаб бола парваришида унчалик кўп қийинчиликларга дуч келмаганман, лекин қизим билан алоҳида яшаганимиз, ўқишлар қийинлиги учун бошида анча қийналдим. Ўқишни эплаб кетишимда турмуш ўртоғимнинг қўллаб-қувватлови, рағбати кучли бўлди. 

Ҳозирги кунда ўқиш ва фарзанд тарбиясидан ташқари Instagram тармоғида ўз шахсий саҳифамни юритаман. Бу мен учун ҳам ҳобби, ҳам мақсадим ёш болали оналар ҳам турмуш ўртоғининг қўллаб-қувватлаши билан ўқиши, хоҳлаганларига эришиши мумкинлигини кўрсатишдан иборат.

Кореяда нарх-наво анча баланд. Шунинг учун грант дастурлари асосида ўқиш хорижлик талабалар учун қулайроқ. Бироқ шартнома асосида ўқиётган талабаларда ҳам дарсдан ташқари ишлаш имконияти бор. Ҳам ўқиб, ҳам ишлаб ўз кунлик харажатларини ўзлари кўтараётган ўзбекистонлик талабалар ҳам жуда кўп. Фақат миграция қоидаларига риоя қилиш талаб этилади.

Корея таълимида мени энг ҳайрон қолдирган нарса ҳамма нарсани онлайн тарзда бажариш имкони яратилгани бўлди. Масалан, давоматдан ҳам телефондаги махсус дастур орқали ўтилади, уйга вазифалар ҳам доим электрон топширилади. Талабаларнинг мустақил фикрлашига катта эътибор берилади.

Кореяда таълим олаётган ёш болали оналар жуда кўп. Улар ҳамма нарсага, ўқишга, ишга улгуришга ҳаракат қилишади. Уларнинг ҳаракатчанлигига ҳавасим келади.

Корея боғчалари ҳақида

Кореяда боғчалар жуда тартибли ва ишончли: давлат ва хусусий боғчаларга бўлинади. Корея фуқаролари учун давлат боғчалари текин, лекин чет элликлар учун пулли. 3 ёшдан бошлаб хорижлик фуқаролар ҳам боласини давлат боғчасига текинга бериши мумкин. Лекин худди Ўзбекистондагидек давлат боғчаларига навбатлар кўп. Ҳозир қизим корейс давлат боғчасига боради, лекин хорижлик фуқаро бўлганимиз ва қизимиз 3 ёшга тўлмагани учун боғчага ойига 500 доллар тўлаймиз.

Кореяда четдан келиб яшаётган ёш оилалар учун асосий қийинчилик нарх-наво билан боғлиқ. Бу ерда нархлар нисбатан юқори. Лекин эр-хотин биргаликда ишласа, бемалол оилавий яшашга ҳам имкон топиш мумкин. Тахминан ўртача 2-3 минг доллар атрофида даромади бўлса, ёш оилалар яхши яшаши мумкин.

Зилола Ғайбуллаева, Мақсуда Абдуқаюмова суҳбатлашди.