2018 йилдан кейин қурилган ноқонуний уйларнинг тақдири нима бўлади?

Давлат кадастрлари палатаси раиси Моҳир Валиевнинг таъкидлашича, 2018 йил 1 майдан кейин ўзбошимчалик билан қурилган ноқонуний турар жойларга кадастр ҳужжатлари расмийлаштирилмайди. “Ўзбекистон аҳолиси кўпайиб боряпти, лекин ери кенгаяётгани йўқ. Ўша бор ери, бундан унумли фойдаланишимиз керак. Тегишли қарорлар билан ноқонуний ерларни ўзлаштиришга бир неча марта акция берилди. Энди буни 2018 йилдан кейингиларга ҳам қилсак ва аниқ муддатини белгиламасак, кеча қурилиб лойи қотмаган уйни эгаллаб олиб, шунга ҳам ҳуқуқ беринглар деган нарсалар бўлиши мумкин”, деди у.

Фото: Kun.uz

Жорий йилнинг 2 июл куни Кадастр агентлиги томонидан “Кўп квартирали уйлар реестри” ахборот тизимининг тақдимотига бағишланган матбуот анжумани ташкил этилади. Kun.uz мухбири расмийларга “2018 йилдан кейин қурилган ноқонуний уйларнинг тақдири нима бўлади?” деган савол билан юзланди. Давлат кадастрлари палатаси раиси Моҳир Валиевнинг таъкидлашича, қонунда белгиланган муддатлардан кейин қурилган ноқонуний турар жойларга ҳуқуқ берилмайди.

“Қонунда 2018 йил 1 майгача бўлган бино-иншоотлар дейилган. Ундан кейин қурилганлар ноқонуний. Биз чеклов қўйишимиз керак. Ўзбекистон аҳолиси кўпайиб боряпти, лекин ери кенгаяётгани йўқ. Ўша бор ери, бундан унумли фойдаланишимиз керак. Тегишли қарорлар билан ноқонуний ерларни ўзлаштиришга бир неча марта акция берилди. Энди буни 2018 йилдан кейингиларга ҳам қилсак ва аниқ муддатини белгиламасак, кеча қурилиб лойи қотмаган уйни эгаллаб олиб, шунга ҳам ҳуқуқ беринглар деган нарсалар бўлиши мумкин. Аҳолимиз кўпайишини ҳисобга олган ҳолда биз ерни асрашимиз керак. Шунинг учун, 2018 йил 1 майдан кейинги даврда космик суратлардан аниқланган уй-жойларга ҳуқуқ берилмайди”, деди у.