UzAuto Motors 19 январь кунидан аввал тузилган шартномалар бўйича Chevrolet Lacetti вa Cobalt автомобилларини мижозларга магнитоласиз етказиб беради.
UzAuto Motors компанияси харидорларга навбатдаги мурожаат билан чиқди.
«Барчага маълумки, яримўтказгичларнинг глобал етишмовчилиги бутун жаҳон автомобиль саноатига ўз таъсирини ўтказди. Ва, афсуски, бу ўзбек ишлаб чиқарувчиларининг ишига ҳам таъсир қилмай қолмади. Сабаби шундаки, микрочипларнинг танқислиги UzAuto Motors компанияси учун ягона бўлган GM сертификатига эга автомагнитола ишлаб чиқарувчи «Humax» корхонасини ҳам четлаб ўтмади. Корея ишлаб чиқарувчиси автомагнитолани етказиб беришни номаълум муддатга тўхтатганлиги ҳақида расмий хат билан мурожаат қилди. UzAuto Motors компанияси автомобилларни етказиб бериш муддатининг узайиши, конвейерларнинг тўхтаб қолиши ҳамда ишчи ўринлари қисқаришининг олдини олиш учун бошқа автомобиль ишлаб чиқарувчилар томонидан бундай шароитларда амалда қўлланган ягона тўғри қарорни қабул қилди – автомобилларни магнитоласиз ишлаб чиқариш», дейилади баёнотда.
Қайд этилишича, жорий йилнинг 19 январь кунидан аввал тузилган шартномалар бўйича Chevrolet Lacetti вa Cobalt автомобиллари «Humax» компанияси томонидан компонентларни етказиб беришдаги узилишлар сабабли, мижозларга магнитоласиз етказиб берилади.
«Ушбу вазиятдан чиқиш учун магнитоласиз автомобиль харидорларига иккита вариант таклиф этилади:
- Ишлаб чиқарувчи томонидан магнитола қурилмаси ҳамда унинг ўрнатилиш харажатларининг қопланиши билан яқин орада ўз автомобилини магнитоласиз олиш. Хоҳишингизга кўра, бозордан ўзингизга ёққан хоҳлаган турдаги автомагнитолани UzAuto Motors расмий дилерларида ўрнатиш билан автомобилга берилган кафолатни йўқотмайсиз.
- Автомобилни кейинчалик текин қайта жиҳозлаш билан магнитоласиз олиб кетиш. Ишлаб чиқарувчи томонидан магнитола етказиб берилгандан сўнг, автомобилни қайта жиҳозлаш», дея қўшимча қилинган.
Аввалроқ, UzAuto Motors шартнома бўйича 2021 йил ноябрь-декабрь ойларида автомобиль олишини кутаётган мижозларга автомобиллари яна 2 ой ўтиб етказиб берилишини маълум қилганди.
Шунингдек, компания ўтган йилнинг 5-17 декабрь кунлари ишлаб чиқарилган Nexia, Cobalt вa Lacetti автомобилларини чақириб олганди. Бу автомобилларнинг орқа ойна иситиш тизимини текшириш зарурати билан боғлиқлиги айтилган.
