Қадимги Миср бўйича оммабоп афсоналардан бири рад этилди

Канададаги Альберта университети олимлари 70-йилларда Мендес некрополида топилган қадимги мисрлик аёл қолдиқларини ўрганиб чиқишди ва у эркакларга хос бўлган касб билан шуғуллангани ҳамда папирусдан маиший буюмларни тайёрлаганини аниқлашди. Илгари аёлларга бундай ишлар рухсат берилмаган, деб ҳисобланарди. Бу ҳақда Science Alert нашри хабар қилмоқда.

Тадқиқотчилар электрон микроскопия ва микрография ёрдамида тўрт минг йил аввал (эрамиздан аввалги 2181-2055 йиллар) яшаган, 50 ёшдан катта бўлган аёлнинг тишларини таҳлил қилишди. Улар 24та тишдан 16тасида ейилиш белгиларини топишган. Хусусан, юқори жағдаги иккита тишда пона шаклидаги бузилиш излари аниқланди, қолган ўн тўртта тишда ейилиш кузатилди. Бундай ҳолат тишлари билан ўсимлик материалига ишлов берган ҳунармандлар учун хосдир.

Олимлар сўзига кўра, аёл папирусни қутилар ва саватлар, шунингдек, шиппаклар, пардалар ва гиламчалар ясаш учун ишлатган.

Илгари Қадимги Мисрда аёллар фақатгина еттита касб билан шуғулланиши мумкин бўлган, деб ҳисобланган. Бу қабрлар деворларидаги ёзувлар ва тасвирларда акс этган. Улар маъбудлар ибодатхоналарида ишлашган, қўшиқчилар, раққосалар, мусиқачилар, йиғичилар, тўқувчилар ва доялар бўлган.