Эронга зарба беришга тайёр АҚШ, музокарадан кўнгли тўлмаган Зеленский ва НАТОни айблаган Патрушев – кун дайжести

Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.

ОАВ: «АҚШ 21 февралдаёқ Эронга зарбалар беришга тайёр»

АҚШ ҳарбийлари Эронга эҳтимолий зарбаларни 21 февралнинг ўзидаёқ беришга тайёр. Аммо бундай ҳаракатлар фақат дам олиш кунлари билан чекланиб қолмай, узоқроқ давом этади. Бу ҳақда CBS News телеканали чоршанба куни манбаларга таяниб хабар қилди.

Манбаларга кўра, АҚШ президенти Доналд Трамп зарба бериш ҳақида ҳали якуний қарор қабул қилмаган. Оқ уй кескинлашув (эскалация) хатарларини баҳоламоқда. Кейинги уч кун ичида Пентагон Яқин Шарқ минтақасидан ходимларнинг бир қисмини вақтинча олиб чиқади — асосан Европа ёки АҚШга.

Шу билан бирга, манбалардан бирининг айтишича, эҳтимолий ҳарбий амалиёт олдидан Пентагон ресурслар ва ходимларни кўчириши одатий амалиёт ҳисобланади, бироқ бу, албатта, ҳужум муқаррар дегани эмас.

Axios нашри манбаларига кўра эса АҚШнинг Эрондаги ҳарбий амалиёти катта эҳтимол билан бир неча ҳафта давом этадиган кенг кўламли кампания бўлади. У январда Венесуэладаги операциядан кўра кўпроқ тўлиқ масштабли урушга ўхшайди.

Нашрнинг ёзишича, эҳтимол гап АҚШ–Исроил қўшма кампанияси ҳақида кетмоқда.

Зеленский: «Женевадаги музокаралар натижалари етарли эмас»

Россия делегацияси билан Женевада бўлиб ўтган икки кунлик музокаралар натижалари етарли эмас. Бу ҳақда Украина президенти Володимир Зеленский кечки видеомурожаатида маълум қилди.

«Украина натижага қизиққан. Бугунги ҳолатга кўра, натижа етарли деб айта олмаймиз», - деди Украина раҳбари.

Унинг сўзларига кўра, ҳарбийлар ўртасидаги алоқалар жиддий ва мазмунли бўлган. Шу билан бирга, эҳтимолий муросаларга тааллуқли сиёсий масалалар ва икки мамлакат раҳбарларининг зарур учрашуви билан боғлиқ жиҳатлар «ҳали етарлича ишлаб чиқилмаган», деб ҳисоблайди Зеленский. «Кейинги учрашувни кутяпмиз, уни яна феврал ойининг ўзида ўтказиш тўғри бўлар эди», деди у.

Володимир Зеленский, шунингдек, делегация олдига гуманитар йўналишни муҳокама қилиш вазифасини қўйганини билдирди. «Асирлар алмашинуви керак, фуқароларни озод қилиш керак». У Украина Қуролли кучларининг саъй-ҳаракатлари ҳам гуманитар натижаларни, ҳам Киевнинг кучли дипломатик позицияларини таъминлашини қўшимча қилди.

Патрушев НАТОни «ҳужумкор гуруҳ» тузишда айблади

Россия Болтиқ денгизида блокада юзага келиб, вазиятни тинч йўл билан ҳал этиш имконсиз бўлса, ўз ҳарбий-денгиз флотини ишга солади. Бу ҳақда «Аргументы и факты»га берган интервюсида РФ президенти ёрдамчиси Николай Патрушев билдирди. У айни пайтда РФ Денгиз коллегияси раиси ҳам ҳисобланади.

«Биринчи қадам сифатида биз умумэътироф этилган сиёсий-дипломатик ва ҳуқуқий механизмларни ишга соламиз», - деди Патрушев. «Агар бу вазиятни тинч йўл билан тартибга солишнинг иложи бўлмаса, у ҳолда блокадани ёриб ўтиш ва бартараф этиш билан ҳарбий-денгиз флоти шуғулланади», деб қўшимча қилди Патрушев. У 2000-йиллар бошида РФ Федерал хавфсизлик хизмати директори лавозимида ишлаган.

Николай Патрушевга кўра, Финландия «Россия шимол-ғарбий ҳудудларига етиб бора оладиган» зарба берувчи қуроллар билан ўз ҳарбий-денгиз кучларини таъминлаяпти.

Патрушев версиясига кўра, Шимолий Атлантика алянси Калининград вилоятини блоклашни, шунингдек, Россиянинг денгизларга чиқишини ҳам тўсишни режалаштирмоқда. «Европа байроқлари остида денгизларда жуда кўп кемалар қатнайди, буни унутмайлик. Бизда ҳам улар нима ташияпти ва қаерга олиб кетяпти, деган қизиқиш пайдо бўлиши мумкин», дея огоҳлантирди РФ президенти ёрдамчиси.

«Путин яна икки йил урушишни режалаштирмоқда» – NYT

Украинанинг Донбасс ҳудудини тўлиқ босиб олиш учун Россияга яна икки йил керак. Кремлдагилар бу ҳисоб-китоблар билан таниш ва урушни шу сценарий бўйича давом эттиришга рози кўринади.

The New York Times газетасининг ёзишича, Ғарб разведка маълумотларига кўра, Владимир Путин Украина билан урушда ғалаба қозонаётганига ишонмоқда.

«У Донбасс устидан тўлиқ назорат ўрнатиш учун 18 ойдан икки йилгача вақт керак бўлса ҳам, ҳар бир жанг куни унга кўпроқ устунлик беришига ишончи комил», дейилади мақолада.

Шу билан бирга, нашрнинг таъкидлашича, сўнгги ойларда Россия иқтисодиёти чуқур муаммоларга дуч келмоқда. Доналд Трамп эса уруш тугаган тақдирда Россияга катта сармоя киритишни таклиф қилмоқда.

«Бундай динамикани ҳисобга олган ҳолда, баъзи таҳлилчилар Путин ҳали ҳам Украинадаги жанговар ҳаракатларни тўхтатиш бўйича келишув тузиши мумкинлигини тахмин қилмоқда. Айниқса у Қўшма Штатлар билан узоқ муддатли яқинлашувни ва Украина қўшинларини Донбасснинг қолган қисмидан олиб чиқишни таъминласа», деб ёзди NYT.