Республика Маънавият ва маърифат маркази раҳбари ишдан кетди

Республика Маънавият ва маърифат маркази раҳбари Минҳожиддин Мирзажанович Ҳожиматов (Минҳожиддин Мирзо) бошқа ишга ўтиши муносабати билан лавозимидан озод қилинди.

У Ёзувчилар уюшмаси раисининг ижодий масалалар бўйича биринчи ўринбосари лавозимига тайинланди.

Шоир ва журналист Минҳожиддин Мирзо 1965 йилда туғилган, 1990 йилда Тошкент давлат университети Журналистика факультетини тамомлаган. 2013–2014 йилларда Ўзбекистон маданият ва спорт вазири бўлган. 2012–2013 йилларда Миллий телерадиокомпания раисининг биринчи ўринбосари сифатида ишлаган. 2018 йилда Ёзувчилар уюшмаси раиси ўринбосарлигига ўтган. 2019 йил сентябр ойида Маънавият ва маърифат маркази раҳбари этиб тайинланганди.

Эндиликда Отабек Абдурашидович Ҳасанов Маънавият ва маърифат марказининг янги раҳбари бўлди. У шу вақтгача президент ҳузуридаги Давлат хизматини ривожлантириш агентлиги директори биринчи ўринбосари сифатида ишлаб келаётганди.