Кадастр агентлиги Андижон тумани бўлими собиқ бошлиғи ушланди

У 1 гектар ер майдони тоифасини ўзгартириб, кадастр ҳужжатларини расмийлаштириб беришни айтиб, эвазига пул олаётганида қўлга олинди.

Фото: Андижон вилояти прокуратураси

Кадастр агентлиги Андижон тумани бўлими собиқ бошлиғи А.М. ҳамда собиқ ходими С.О. 10 минг доллар олаётганида ушланди. Бу ҳақда Андижон вилояти прокуратураси хабар берди.

Қайд қилинишича, улар Андижон туманидан боғдорчилик учун ажратилган 1 гектар ер майдонини Республика Кадастр палатасида ишловчи танишлари орқали турар жой сифатида тоифасини ўзгартириб, кадастр ҳужжатларини расмийлаштириб беришни айтган.

Ҳолат юзасидан А.М. ва бошқаларга нисбатан Жиноят кодексининг 168-моддаси 3-қисми «а,б» бандлари, 28,211-моддаси 2-қисми «а,б» бандлари билан жиноят иши қўзғатилиб, процессуал тартибда ушланган. Тергов ҳаракатлари олиб борилмоқда.