«Сити» ва «Ливерпул» ютқазди, «Барса»да йирик ғалаба. Кун ўйинлари

Англия: «Ливерпул» чуқур инқирозда

«Ливерпул» – «Ноттингҳэм Форест» 0:3
Голлар: Мурилло, 33 (0:1). Савона, 46 (0:2). Гиббс-Уайт, 78 (0:3)
«Ливерпул»: Алиссон, ван Дейк, Конате (Экитике, 55), Керкез (Робертсон, 68), Собослаи, Гравенберҳ, Жонс (Нгумоҳа, 78), Макаллистер, Гакпо, Салоҳ, Исак (Киеза, 68)
«Ноттингҳэм Форест»: Селс, Мурилло, Миленкович, Уилямс, Савона, Сангаре, Андерсон, Гиббс-Уайт, Домингес (Ҳатчинсон, 61), Ндой (Йейтс, 86), Игор Жезус (Ҳадсон-Одои, 86)
Огоҳлантиришлар: Гравенберҳ, 66. Киеза, 87

«Ливерпул» чўкишда давом этмоқда. «Астон Вилла» устидан ғалаба ва ЕЧЛда «Реал» билан кўрсатилган намунали ўйин ортидан кетма-кет йирик ҳисобдаги мағлубиятлар қайд этилди. Ўтган турда «Манчестер Сити»га 0:3 ҳисобида ютқазган Слот шогирдлари бу турда ўз майдонида ҳам 3 та жавобсиз гол ўтказиб юборди. Ҳолбуки рақиб турнир жадвалининг қуйи қисмидаги «Ноттингҳэм» эди. Мерсисайдликлар тарихида АПЛда қаторасига икки йирик мағлубият узоқ 1965 йилда рўй берганди.

Мавсум бошидан буён икки бош мураббийни ишдан бўшатган «ўрмончилар» Шон Дайч келгач, яна ҳимоявий ўйнашга ўтди, аммо бу сафарги ўйинда айнан ҳимоячилар ҳужумда фаол бўлишди. Биринчи бўлимда Мурилло стандарт вазиятдан ҳисобни очганди, иккинчи бўлим бошида Савона бошқа бир латерал Уилямснинг узатмасини голга айлантирди. Ва фақат учинчи гол «Ноттингҳэм»нинг энг ҳужумкор футболчиси Гиббс-Уайт номига ёзилди. «Ливерпул» эса ҳужумда ҳеч нарса ўйлаб топа олмади, ёздаги энг қимматбаҳо трансферга айланган Исак эса фақат клуб учун минусга ишламоқда. У мерсисайдликлар сафида АПЛдаги дастлабки тўрт ўйинида ҳам ютқазган илк футболчига айланди.

«Энфилд»га йиғилган мухлислар ўйин тугашини кутмасдан кета бошлашди.

Мавсум бошидан буён 12 турдан 6 тасида ютқазган (АПЛда сўнгги етти ўйиндан олти мағлубият) амалдаги чемпионлар энди турнир жадвалининг иккинчи қисмига тушиб кетди. Жамоа кейинги турда «Вест Ҳэм» майдонида вазиятни ўнглашга ҳаракат қилади.

«Бёрнли» – «Челси» 0:2
Голлар: Педру Нету, 37 (0:1). Фернандес, 88 (0:2)
«Бёрнли»: Дубравка, Эстев, Туанзебе, Хартман, Уокер, Флорентину (Лоран, 84), Каллен, Угочукву (Межбри, 72), Энтони (Фостер, 72), Чауна (Брун Ларсен, 76), Флемминг (Бройя, 72)
«Челси»: Санчес, Адарабиойо, Чалоба, Кукуреля, Жеймс (Бадиашиле, 46), Фернандес, Сантос, Жоао Педро (Гиу, 76), Гиттенс, Педру Нету, Делап (Гюсто, 67)
Огоҳлантиришлар: Уокер, 49. Межбри, 82 – Педру Нету, 41. Жоао Педро, 69. Бадиашиле, 81

«Челси» эса «Бёрнли»га қарши ўйиннинг биринчи бўлими охирларида босимни кучайтирди ва мақсадига эришди. Кукуреля марказий форвард ролида пайдо бўлиб, анча ичкаридан узатилган пасдан кейин тўпни ўзига бўйсундириб, ҳужумни давом эттирди, Байно-Гиттенснинг узатмасини эса Педру Нету бош билан голга айлантирди. Португалиялик вингер яна гол уриши мумкин эди, аммо унинг зарбасидан кейин тўп устунга борди. Иккинчи бўлим охирларида эса Энцо Фернандесга иккинчи голни уриш учун ҳеч нарса тўсқинлик қила олмади. Бу ғалабадан кейин Энцо Мареска шогирдлари иккинчи ўринга кўтарилди.

«Нюкасл Юнайтед» – «Манчестер Сити» 2:1
Голлар: Барнс, 63 (1:0). Рубен Диаш, 68 (1:1). Барнс, 70 (2:1)
«Нюкасл Юнайтед»: Поуп, Шер, Тшау, Ҳолл (Ботман, 77), Ливраменто, Тонали, Жоэлинтон, Гимарайнс, Барнс (Уиллок, 85), Мёрфи, Волтемаде (Эланга, 85)
«Манчестер Сити»: Доннарумма, Рубен Диаш, Гвардиол, О`Райли, Матеус Нунес, Гонсалес, Фоден (Мармуш, 87), Бернарду Силва (Рейндерс, 77), Доку (Савио, 76), Шерки (Бобб, 77), Ҳоланд
Огоҳлантиришлар: Жоэлинтон, 90 – Доннарумма, 71. Бобб, 90. Бернарду Силва, 90

«Сент-Жеймс Парк»даги ўйин кутилганидек меҳмон жамоага катта қийинчилик туғдирди, стадионга йиғилган мухлислар биринчи бўлимнинг ўзидаёқ гол кўриши мумкин эди (Opta ҳисобига кўра, жамоалар жами 7 та яққол вазият яратишган), Доннарумма бир неча бор жамоасини қутқарди, 31-дақиқада эса Барнс бўш дарвозани ишғол этолмади.

Ўз навбатида, «шаҳарликлар» сафида Ҳоланд ва Фоден ҳам қулай имкониятлардан фойдалана олмади. Иккинчи бўлимда эса Барнс барибир ўз мақсадига эришди ва «Нюкасл»ни ҳисобда олдинга олиб чиқди, аммо «Манчестер Сити» бир неча дақиқа ўтиб Диашнинг зарбаси эвазига ҳисобни тенглаштирди. Аммо меҳмонларнинг қувончи узоққа чўзилмади ва Барнс дублни расмийлаштирди.

Хосеп Гвардиола дарҳол уч футболчини алмаштирди (Рейндерс, Оскар Бобб ва Савинио туширилди) ва «Сити» ташаббусни қўлга олди. Кейинги 10 дақиқаликда меҳмонларнинг тўпга эгалик қилиш кўрсаткичи 91 фоизгача етди. Савиниода жамоасини мағлубиятдан қутқариб қолиш учун яхши имконият юзага келди, аммо унинг яқин масофадан йўллаган зарбаси юқоридан ўтиб кетди. Ҳакам ўйинга саккиз дақиқа қўшиб берди, аммо Эдди Ҳау шогирдлари матонат кўрсатиб, ғалабали ҳисобни сақлаб қолишди. Натижада Гвардиола шогирдлари учинчи ўринга тушиб кетди, бугун «Арсенал» Лондон дербисида ғалаба қозонадиган бўлса, «Сити» билан орадаги фарқни 7 очкога (иккинчи ўринга кўтарилиб олган «Челси» билан эса олти очкога) етказади.

Испания: «Барселона» «Камп Ноу»га қайтишини йирик ғалаба билан нишонлади

«Барселона» – «Атлетик» 4:0
Голлар: Левандовски, 4 (1:0). Торрес, 45+3 (2:0). Фермин Лопес, 48 (3:0). Торрес, 90 (4:0)
«Барселона»: Х. Гарсия, Кубарси, Э. Гарсия (Бернал, 74), Мартин, Кунде, Олмо (Рафиня, 81), Торрес, Фермин Лопес (Касадо, 64), Балде (Араухо, 46), Ямал, Левандовски (Фернандес, 64)
«Атлетик»: Симон, Вивиан, Ляпорт, Берчиче, Горосабел, Руис де Галаррета (Рего, 55), Хаурегисар (Бойро, 68), Сансет, Уилямс (Гурусета, 56), Беренгер (Весга, 68), Гомес (Наварро, 56)
Огоҳлантиришлар: Руис де Галаррета, 43. Горосабел, 73
Четлатиш: Сансет, 54

«Барселона» 909 кун ўтиб «Камп Ноу»га қайтди ва мухлислари учун ҳақиқий байрам уюштириб берди. Стадионга йиғилган 45 минг мухлис 4-дақиқадаёқ Левандовскининг тезкор голини нишонлади. Формасини тиклаб, яна олдинги даражасига қайтаётган Ямал эса икки бор тривела услубидаги паси билан Торресни голли вазиятга чиқарди. Ферран — 2025 йил бошидан ҳисобланганда, энг сермаҳсул испан футболчисига айланди, у бу даврдаги голлари сонини 22 тага етказди. Каталонияликлар ўйин давомида 19 зарба берди ва йирик ҳисобдаги ғалабага эришди.

Яна бир эътиборли жиҳат, шу куни Ҳанси Флик бошланғич таркибда тўққиз нафар маҳаллий футболчини туширганди. Бунақаси кўк-анорранглилар жамоасида 2014 йил январидан буён кузатилмаганди, ўшанда ҳам Херардо Мартино тўққиз нафар испан футболчисини бошланғич таркибга киритганди. Флик бу натижани такрорлашида жароҳат туфайли икки ой ўйнай олмаган Жоан Гарсиянинг сафга қайтиши қўл келди.

Шу куни икки ойлик танаффусдан кейин Рафиня ҳам майдонга тушди. 

Бу ғалабадан кейин каталонияликлар камида «Реал»нинг якшанба кунги ўйини якунига қадар турнир жадвалида биринчи ўринга чиқиб олди.

«Вилярреал» – «Малйорка» 2:1
Голлар: Морено, 6 (1:0). Кошта, 8 (1:1). Олувасейи, 83 (2:1)
«Вилярреал»: Луис Жуниор, Марин (Бюкенен, 80), Вейга, Педраса, Наварро, Комесаня, Парти (Гейе, 63), Молейро (Соломон, 74), Пепе, Морено (Микаутадзе, 63), Перес (Олувасейи, 63)
«Малйорка»: Бергстрем, Райльо, Вальент, Мохика, Маффео, Маскарел (Морланес, 86), Кошта, Пабло Торре (Дардер, 69), Вирхили (Муричи, 74), Санчес (Асано, 86), Жозеф (Лябрес, 86)
Огоҳлантиришлар: Луис Жуниор, 89. Бюкенен, 90 – Бергстрем, 67. Мохика, 75

Жерар Морено яна гол уриб, голли сериясини тўрт ўйинга етказди. Аммо унинг тезкор голи ғалаба кафолати бўла олмади. «Вилярреал» икки дақиқа ўтиб жавоб голини ўтказиб юборди ва жиддий муаммоларга тўқнашди. «Сариқ субмариналар» фақат ўйин охирида ғалаба голини уришди ва тур якунларига кўра учинчи ўринни ўзида сақлаб қоладиган бўлишди, «Малйорка» ҳимоячиси қанотдан узатилган пасдан кейин тўпни узоқлаштиришда хатога йўл қўйди ва Олувасейи осонлик билан дарвозани ишғол этди.

Италия: Неаполнинг магияси

«Фиорентина» – «Ювентус» 1:1
Голлар: Костич, 45+5 (0:1). Мандрагора, 48 (1:1)
«Фиорентина»: де Хеа, Мари, Раниери (Вити, 82), Понграчич, Зом (Ндур, 60), Мандрагора, Фаджоли, Паризи (Куадио, 69), Додо (Фортини, 46), Кин, Пикколи (Гудмундссон, 60)
«Ювентус»: Ди Грегорио, Келли, Копмейнерс, Калюлю, Локателли, Тюрам (Кабал, 66), Костич (Миретти, 66), Камбясо (Консейсау, 76), Кенан Йилдиз (Опенда, 88), Маккенни, Влаҳович (Давид, 88)
Огоҳлантиришлар: Фаджоли, 7. Мандрагора, 84. Паризи, 87 – Маккенни, 42. Кабал, 84. Миретти, 90

«Фиорентина» ва «Ювентус» учрашуви мезбонларнинг собиқ футболчиси Влаҳович манзилига қаратилган ҳақоратлар туфайли тўхтатилиши мумкин эди. Мезбон жамоа фанатлари дастлабки огоҳлантиришни эътиборсиз қолдиришди ва сербиялик форвард пеналти ишлаш умидида жарима майдонида йиқилгач, янада катта куч билан ҳужумга ўтишди. Видеотакрордан кейин 11 метрлик жарима зарбаси бекор қилинди. Влаҳович Пабло Маридан қочиб кетиб, дарвозабонни ҳам алдаб ўтиб, бўш дарвозани ишғол эта олмаганида эса, трибуналардаги мухлислар худди ўз жамоаси гол ургандек хурсандчилик қилишди.

Ва барибир биринчи бўлим «Ювентус» ҳисобига ёзилди, бўлимга қўшиб берилган олтинчи дақиқада Костич олис масофадан идеал зарба йўллади. Бянконерилар танаффусга аъло кайфиятда йўл олишди, аммо улар ўйиннинг иккинчи бўлимини яхши ўтказа олишмади. Аввалига дарвоза тўсинини пойлаган Мойзе Кин бироз ўтиб Мандрагоранинг голига узатма берди. Туринликлар Лучано Спаллетти бошқаруви даврида ҳам дуранг ҳисоблардан қутула олмаяпти (унинг давридаги учинчи дуранг) ва турнир жадвалида 6-ўринда қолмоқда.

«Наполи» – «Аталанта» 3:1
Голлар: Нерес, 17 (1:0). Нерес, 38 (2:0). Ланг, 45 (3:0). Скамакка, 52 (3:1)
«Наполи»: Милинкович-Савич, Ррахмани (Жуан Жезус, 64), Буонджорно, Бекема, Мактоминай, Лоботка, Гутеррес (Маццокки, 69), Ди Лоренцо, Ланг (Элмас, 69), Нерес (Политано, 69), Ҳойлунд (Лукка, 74)
«Аталанта»: Карнесекки, Хин, Аханор (Коссуну, 46), Жимсити, Эдерсон, де Рон, Дзаппакоста (Залевски, 62), Белланова, Пашалич (Скамакка, 46), Лукман (Малдини, 82), Де Кетеларе (Самарджич, 77)
Огоҳлантиришлар: Жуан Жезус, 75 – де Рон, 59. Дзаппакоста, 62

«Наполи» халқаро танаффусдан олдин барча турнирлар доирасида қаторасига уч ўйинда гол уролмаган, А Серияда «Болоня»га ютқазиб, пешқадамликни бой берганди. Амалдаги чемпионлар ажойиб қайтишни амалга оширишди ва бу мавсумда ўзига ўхшамаётган «Аталанта»га қарши ўйинни биринчи бўлимдаёқ ҳал қилишди. Замбо-Ангиссанинг жароҳати туфайли бошланғич таркибдан ўрин олган Давид Нерес ишончни оқлади, у аввалига Ҳойлунднинг пасидан кейин ҳимоячилардан қочиб кетиб, ҳисобни очди, кейин эса меҳмонлар дарвозабони Карнесеккининг ҳимоядан чиқишда йўл қўйган хатосидан бошланган ҳужумга ҳам гол билан нуқта қўйди. Бўлим сўнгида Ланг ҳисобни йириклаштирди ва иккинчи бўлим қуруқ расмиятчиликка айланди. Энди «Наполи» камида рақобатчиларнинг якшанба кунги ўйинлари якунига қадар турнир жадвалида пешқадам бўлиб қолади, Антонио Конте шогирдлари Европада кучли бешликнинг 2025 йилда бирорта уй учрашувида ютқазмаган ягона жамоаси бўлиб қолмоқда.

Германия: Олисенинг бенефиси

«Бавария» – «Фрайбург» 6:2
Голлар: Судзуки, 12 (0:1). Манзамби, 17 (0:2). Карл, 22 (1:2). Олисе, 45+2 (2:2). Упамекано, 55 (3:2). Кейн, 60 (4:2). Жексон, 78 (5:2). Олисе, 84 (6:2)
«Бавария»: Нойер, Упамекано (Ким Мин Жэ, 77), Та, Бишоф, Станишич, Горецка (Лаймер, 46), Павлович (Ито, 83), Олисе, Диас, Карл (Жексон, 71), Кейн (Майк, 83)
«Фрайбург»: Атуболу, Гинтер, Розенфельдер (Линхарт, 77), Макенго, Трой, Эггештайн, Манзамби (Остераге, 64), Судзуки (Грифо, 77), Шерхант (Динкчи, 64), Бесте, Хелер (Матанович, 64)
Огоҳлантириш: Павлович, 40

«Бавария» халқаро танаффус арафасида «Унион» майдонида дуранг ўйнаб (2:2), ғалабали сериясини тўхтатганди. Шанба куни «Алянц Арена»даги ўйиннинг 17-дақиқасига келиб таблода 0:2 рақамлари порлай бошлаганида, айримлар чемпионларда инқироз юзага келгани ҳақида ҳам ўйлади. Аммо бу фақат иллюзия бўлиб чиқди ва Олисе барча шубҳаларни йўққа чиқарди. У жамоасининг 6 голидан 5 тасида иштирок этди (2+3). Олисенинг бенефиси биринчи жавоб голини урган Карлга узатма билан бошланди. Бўлим охирида эсаўзи гол уриб, мувозанатни тиклади, танаффусдан кейин унинг бурчакдан узатмасини Упамекано голга айлантирди, кейин Жексонга голли узатма берди, охирида ўз услубидаги айланма зарбаси билан олис бурчакни нишонга олиб, ўйинга якуний нуқтани қўйди. Бавария машинаси тўхташ ҳақида ўйламаяпти. Венсан Компани шогирдлари Германия чемпионатида 43 турдан буён биринчи ўриндан тушгани йўқ.

«Боруссия» Д – «Штутгарт» 3:3
Голлар: Эмре Жан, 34 – пеналти (1:0). Байер, 41 (2:0). Дениз Ундав, 47 (2:1). Дениз Ундав, 71 (2:2). Адейеми, 89 (3:2). Дениз Ундав, 90+1 (3:3)
«Боруссия» Д: Кобел, Эмре Жан, Шлоттербек, Антон, Беллингем, Нмеча, Байер (Силва, 90+3), Рюэрсон, Брандт (Свенссон, 73), Чуквуэмека (Адейеми, 77), Гирасси
«Штутгарт»: Нюбел, Шабо, Елч, Миттелштедт (Хендрикс, 80), Ассинон, Штиллер (Каразор, 90+3), Андрес (Нарти, 80), Ал-Ҳаннус, Левелинг (Вагноман, 90+4), Тиагу Томаш (Фюрих, 73), Дениз Ундав
Огоҳлантиришлар: Байер, 81 – Елч, 24

Турнинг марказий баҳси ҳаддан ташқари ёрқин кечди. «Штутгарт»«Боруссия» майдонида икки бор камбэк амалга оширди ва мезмонларни очколардан маҳрум қилди. Меҳмонлар сифатли ўйин ва мустаҳкам характер намойиш этишди. Дортмундликлар биринчи бўлимни икки гол устунлиги билан якунлаганди, аммо ўтган турда ҳам дубл қайд этган Дениз Ундав икки гол уриб, орадаги фарқни йўққа чиқарди. Адейеми 89-дақиқада мезбонларни яна ҳисобда олдинга олиб чиқди ва «Сигнал Идуна Парк» ғалабани нишонлашга тайёргарлик кўра бошлади. Аммо меҳмонлар бу зарбадан синиб қолмади ва қўшимча дақиқаларда Ундав ҳет-трикни расмийлаштирди. Энди «Боруссия» ушбу форвард учун фаолиятидаги энг севимли клубга айланди (5 гол).

Франция: Погба майдонга қайтди

«Ренн» – «Монако» 4:1
Голлар: Аит Будлал, 20 (1:0). М. Камара, 48 (2:0). Эмболо, 73 (3:0). Блас, 83 – пеналти (4:0). Биерет, 90+5 (4:1)
«Ренн»: Самба, Аит Будлал, Брассье, Жаке, Сиссе (Мерлен, 74), Ронже, М. Камара, Ал-Таамари (Г. Камара, 85), Франковски (Сейду, 90+1), Эмболо (Розе, 90+1), Лепол (Блас, 75)
«Монако»: Градецки, Салису, Керер, Тезе, Закария, Кулибали (Погба, 85), Уттара, Диатта (Вандерсон, 70), Аклиуш (Л. Камара, 70), Фати (Минамино, 61), Иленихеня (Биерет, 61)
Огоҳлантириш: Аклиуш, 19
Четлатиш: Закариё, 66

«Монако» қаторасига учинчи ўйинда ютқазди (қаторасига иккинчи ўйинда йирик ҳисобда) ва турнир жадвалида пастга шўнғишда давом этди. «Ренн» майдонидаги ўйин Закариёнинг қизил карточкасидан кейин амалда ҳал бўлди. Аммо ўйинда мухлислар учун ижобий воқеа ҳам рўй берди: монегаскликлар бош мураббийи Себастян Поконоли ўйиннинг 85-дақиқасида Пол Погбани майдонга туширди. Антидопинг қоидаларини бузгани учун дисквалификацияга учраган франциялик 32 ёшли яримҳимоячи учун бу 2023 йил 3 сентябрдан буён илк ўйин бўлди.

«ПСЖ» – «Гавр» 3:0
Голлар: Ли Кан Ин, 29 (1:0). Жоау Невеш, 65 (2:0). Барколя, 87 (3:0)
«ПСЖ»: Шевале, Бералдо (Эрнандез, 64), Забарний, Нуну Мендеш, Заир-Эмери, Витиня (Кварацхелия, 71), Маюлу (Руис, 71), Жоау Невеш, Мбай, Ли Кан Ин (Барколя, 55), Рамуш (Нджанту, 64)
«Гавр»: Диав, Лорис, Санганте, Зуауи, Него (Намли, 84), Секо, Ндиайе (Мамбимби, 84), Туре (Хадра, 58), Эбоног, Кехта (Дукуре, 75), Сумаре
Огоҳлантиришлар: Нуну Мендеш, 61. Нджанту, 70 – Туре, 32

Луис Энрике ЕЧЛ ўйинидан олдин ўз одатига кўра қатор етакчиларга дам берди. Парижликлар аралаш таркибда ўйнаганига қарамай, йирик ҳисобда ғалабага эришди. Бошланғич таркибда тушган Нуну Мендеш Ли Кан Инни гол пас билан таъминлади. Халқаро танаффус вақтида Португалия сафида ҳет-трик қайд этган Жоау Невеш эса Барколя уюштирган ҳужумдан кейин дарвозабондан қайтган тўпга биринчи бўлиб етиб келди. Иккинчи гол мезбонлар учун жуда муҳим эди, чунки бунгача дарвозабон Шевале «ПСЖ»ни қутқаришига тўғри келди, ҳисоб 2:0 ҳолатида эса Сумаренинг зарбаси дарвоза устунига борди. Ўйин охирида Барколя барибир ўз мақсадига эришди ва захирадан ўйинга қўшилган Кварацхелия ёрдамида учинчи голни урди. Бу ғалабадан кейин парижликлар «Марсел»дан биринчи ўринни қайтариб олишди.