Финляндия полицияси Болтиқ денгизида Россиядан келаётган кемани қўлга олди

Санкт-Петербург портидан Исроилга йўл олган юк кемаси Болтиқ денгизидаги сув ости кабелларига қасддан зарар етказишда гумонланмоқда.

Қўлга олинган “Fitburg” кемаси 2025 йил 31 декабр куни Киркконумми портида турибди / Фото: Reuters

31 декабрь куни Финляндия полицияси Россиядан сузиб келаётган кемани қўлга олди. Кема Финляндия кўрфази орқали Хелсинкидан Эстонияга борадиган денгиз ости телекоммуникация кабелига қасддан зарар етказишда гумонланмоқда. Сўнгги йилларда бу ҳудудда шунга ўхшаш бир қатор ҳодисалар содир бўлган.

Финляндия Чегара хизмати расмийларига кўра, ҳодиса пайтида қўлга олинган «Fitburg» юк кемаси Россиянинг Санкт-Петербург портидан Исроилга кетаётган бўлган. Полициянинг маълум қилишича, кема лангарини денгиз тубида судраб бораётган бўлган ва у Финляндия ҳудудий сувларига йўналтирилган. Reutersʼнинг ёзишича, кабель Финляндиянинг Elisa телекоммуникация гуруҳига тегишли.

«Ҳозирча биз телекоммуникацияни оғир шаклда издан чиқариш ва оғир шаклдаги саботаж ва унга уринишда гумон қилмоқдамиз,» деди Хелсинки полицияси бошлиғи Яри Лиукку.

Терговчиларга кўра, кемада бўлган 14 нафар экипаж аъзоси – Россия, Грузия, Қозоғистон ва Озарбайжон фуқаролари. Уларнинг барчаси Финляндия полицияси томонидан ушлаб турилибди. Кема Цент-Винсент ва Гренадин ороллари байроғи остида сузиб юрган.

Маълумотларга кўра, кеманинг эгаси — «Fitburg Shipping Company», бошқарувчиси эса «Albros Shipping and Trading» ҳисобланади. Бу компаниялар ҳолатга изоҳ бермаган.

Финляндия 2024 йил декабрида ҳам Россия билан боғлиқ нефть танкер бортида текширув ўтказган.Ўшанда терговчилар «Eagle-S» кемаси Болтиқ денгизида лангарини судраб бориб электр кабели ва бир нечта алоқа линияларига зарар етказганини айтган. Лекин, судда прокурорлар воқеа қасддан қилинганини исботлай олмаган.

Болтиқ денгизидаги гибрид таҳдидлар

Европа расмийлар Украинадаги уруш бошлаганидан бери Россиянинг гибрид таҳдидлари кучаяётганини айтмоқда. Болтиқ денгизи бўйида саккизта НАТО давлати жойлашган. Бундан ташқари, денгизнинг шарқий қисми орқали Россия ҳам сувга чиқа қолади.

Болтиқ денгизи атрофидаги давлатлар / Фото Норман Ейнштейн

2022 йилда Россия Украинага бостириб кирганидан сўнг денгиз туби нисбатан саёз ҳудудлардан ўтувчи электр кабеллари, алоқа линиялари ва газ қувурларида бир қатор узилишлар содир бўлган.

Сўнгги йилларда НАТО Болтиқда фрегатлар, самолётлар ва денгиз дронлари билан ўз иштирокини кучайтирди. Декабрь ойининг бошида НАТОнинг энг юқори ҳарбий қўмондони ҳам альянс ўз ҳудудини ҳимоя қилиш учун жавоб беришга тайёр бўлиши кераклигини айтганди.

Шунингдек, НАТО ушбу ҳодиса бўйича Финляндия билан алоқада эканини билдирди. «Биз Финландия расмийлари билан Буюк Британияда жойлашган НАТО кемачилик маркази орқали ахборот алмашиб, алоқада бўлиб турибмиз,» деган альянс расмийси.

*Гибрид таҳдидлар — рақибнинг хавфсизлигини издан чиқаришга қаратилган ҳарбий ва ҳарбий бўлмаган усулларни ўз ичига олади. Улар киберҳужумлар, дезинформация кампаниялари, муҳим инфратузилмага зарар етказиш, дронлардан фойдаланишни ўз ичига олиши мумкин.