Австрия канцлери истеъфога чиқди

Австрия канцлери Вернер Файман ўз лавозимидан истеъфога чиқди. Бу ҳақда Рейтер агентлиги хабар тарқатган.

У коалицион ҳукумат раҳбарлиги ҳамда Австрия Социал-демократик партия раҳбарлигидан ҳам истеъфо берган.

Файман мамлакатда қочқинларни қабул қилиш сиёсатида ўта қаттиққўллиги билан омманинг норозилигига учраган. Аввалроқ у бошчилигидаги Австрия ҳукумати Италия билан чегарада 400 метр узунликдаги тўсиқ ўрнатишни режалаштиргани маълум бўлганди.

Ўтган ҳафтада, 1 май кунги митинглар вақтида иштирокчилар Файманга қарши ҳуштакбозликлар қилишганди.

Файман матбуот анжуманида ўз партияси вакилларининг тўла қўллаб-қувватлашини ҳис қилмагани учун шу қарорга келгани ҳақида маълум қилган.

Сўровномалар натижаларига кўра, Социал-демократлар ва уларнинг иттифоқчилари 2018 йилгача бўлиб ўтадиган умумхалқ сайловларида "Австрия Озодлик партияси"дан енгилиши тахмин қилинган.