Швециянинг "Норрбю" футбол клуби ҳимоячиси Меди Дресевич голни нишонлагани учун майдондан четлатилди. Бу антиқа ҳодиса "Тваакер" клубига қарши учрашувда юз берди.
Футболчи ўйиннинг 83-дақиқасида 3-голини киритиб, ўз фаолиятидаги биринчи хет-тригини амалга оширди. Бундан боши осмонга етгудек бўлган футболчи трибунага кўтарилиб, ўзини қизғин олқишлай бошлади. Унга мухлислар ҳам қўшилди.
Бироқ футболчининг бу ҳаракатлари ҳаммага ҳам бирдай ёқмади. Бундай хатти-ҳаракатдан жаҳли чиққан ҳакам футболчига иккинчи сариқ карточка кўрсатиб майдондан четлатди. Учрашув Дресевичнинг жамоаси фойдасига 6:1 ҳисоби билан якунланди.