Туркия армияси ва хавфсизлик кучлари Курдистон ишчи партиясига қарши мамлакат тарихидаги энг йирик операцияни ўтказмоқда, деб айтди Туркия президенти Ражаб Тойиб Эрдўған .
"Биз Суриянинг Жараблус шаҳрида операция бошладик, шунингдек КИПга қарши тарихдаги энг йирик операцияни ўтказмоқдамиз", деб айтди Эрдўған Анқарада губернаторлар билан учрашувда.
Туркиянинг жанубидаги Ҳаккари вилоятидаги Чукуржада ўтган ҳафта охиридан КИПга қарши артиллерия қўллаган ҳолда катта кўламли операция олиб борилмоқда. Туркия қуролли кучлари бош штаби 8 сентябрда операция давомида КИПнинг 186 аъзоси йўқ қилинганини маълум қилди. Шунингдек, Туркия томондан 9 ҳарбий ҳалок бўлган, 20 дан кўпроғи жароҳат олган. Туркия хавфсизлик кучларининг КИП жангариларига қарши операцияси давом этмоқда.
