Калифорниянинг собиқ губернатори, Ҳолливуд киноактёри Арнольд Шварценеггер маълум қилдики, бундан буён республикачи Дональд Трампни президентлик сайловларида қўллаб-қувватлашни тўхтатади.
"Мен 1983 йилдан бери илк марта, АҚШ фуқаролигини олганимдан бери илк марта президентлик сайловида Республикачилар партияси номзодига овоз бермайдиган бўлдим", деган актёр ўз твиттерида.
Шварценеггернинг айтишича, у республикачилар партиясидаги ўртоқларига "ўз бурчларини яхшилаб ўйлаб кўришни" маслаҳат қилади.
Актёр кейинги ойдаги сайловда ҳали қайси томонга овоз бериш масаласини аниқлаштириб олмаганини билдирган ва номзодни алмаштиришга ишора қилган.
Бундан ташқари, Трамни қўллаб-қувватлашдан республикачи сенатор Жон Маккейн ҳам бош тортди.
Эслатиб ўтамиз, Washington Post нашри 7 октябрда Трампнинг иштирокидаги 2005 йилдаги видеони чоп этди. Трамп унда аёлларга тегажоқлик қилиши билан мақтанган.
Трамп ушбу ҳолат юзасидан омма олдида узр сўраб, "яхшироқ бўлишга" ваъда берди.
Бугун эса CNN телеканали ҳам Трамп иштирокидаги видеодан парча намойиш қилди.
АҚШнинг бир қатор сенаторлари Трампни президентлик пойгасини тарк этишга чақирмоқда.
Унинг ўзи эса ҳеч қачон бундай қилмаслигини таъкидламоқда.
Бу воқеалардан кейин Трампнинг нуфузи америкаликлар орасида кескин тушиб бормоқда.
