Трамп: Аёлларни менчалик ҳурмат қиладиган одам йўқ

Дональд Трамп АҚШ президентлигига номзодларнинг иккинчи теледебати чоғида 11 йил олдин аёллар ҳақида айтган ҳақоратли сўзлари оммага ошкор қилинганига муносабат билдириб ўтди.

«Мен оиламдан, америкаликлардан узр сўрайман. Мен бу билан фахрланмайман. Мен ҳозир жуда ноқулай аҳволдаман, уятдаман, у гаплар барча учун эмасди», — деган Трамп.

У ўзи айтганидек ишлар қилмаганини қайд этиб ўтган.

«Мен аёлларни жуда ҳурмат қиламан, аёлларни ҳеч ким менчалик ҳурмат қилмайди», — деган миллиардер.

У АҚШнинг собиқ президенти Билл Клинтон билан боғлиқ можароларга эътиборни қаратган.

«Билл Клинтоннинг нималар қилганини эсланг. Менинг сўзларим тасодифан айтилган, унинг ҳолатида эса у шундай ишларни қилган. Ҳиллари менинг 11 йил олдин гапирган сўзларимни эслатишдан чарчамас экан, бу унинг учун уятли ҳолдир», — дея қайд этган Трамп.

Трампнинг штаби дебатлар бошланишига 1 соат қолганида ушбу можаролар юзасидан матбуот анжумани ўтказганди.