Daily Star: руслар Америкага ҳужумни Аляскани қўлга киритишдан бошлайдилар

Агар Россия АҚШга ҳужум қилишга қарор қилса, унда биринчи навбатда Аляскани қўлга олади, деб ёзди АҚШ ҳарбий-денгиз кучларининг аноним собиқ ҳарбий қўмондонига иқтибос келтирган ҳолда Daily Star. Собиқ ҳарбийнинг фикрича, Обама маъмурияти бу штатни энг ҳимоясиз ҳудудга айлантирган, шунинг учун у Россиянинг бошланғич ҳужумига қулай жой бўлади. 

"Бизнинг флотда Обама Аляскани ҳимоясиз ҳудудга айлантиргани ҳақида фикр вужудга келган. Бу штат учинчи жаҳон уруши ҳолатида операцияларни ўтказиш учун бошланғич нуқтага айланади. Биз Аляскадан Канадагача ва охир-оқибат бутун шимоли-ғарбга бостирилиб кириш хавфи остидамиз", деб айтди номаълум ҳарбий.

Унинг таъкидлашича, руслар тўлиқ миқёсдаги ихтилоф вақтида "алоқа линияларини узиб ташлаш ва муҳим кўприкларни эгаллаб олиш учун йўл-қурилиш бригадалари қиёфасида яширинмоқдалар". Бошқа манбалар ҳам россиялик ҳарбийлар фуқаролик кийимида Аляскага билинтирмасдан келаётганлари, ташландиқ мотеллар ва ҳарбий базаларда яшаётганларини тасдиқламоқдалар.