Обама ёнаётган смартфонлар ҳақида сўз юритиб, Samsung’га ишора қилди

АҚШ президенти Барак Обама ёнаётган смартфонлар ҳақидаги ҳазилида Samsung’га ишора қилди. Бу ҳақида TechCrunch нашри маълум қилди. 

Майамидаги коллежлардан бирида иштирок этган давлат раҳбари шундай деди: “Бу компаниялардан бири янги смартфон билан чиқса-ю, унда бир неча камчиликлар аниқланса, улар нима қилишади? Уни тўғирлашади, янгилашади... Агар ёниб кетмаса, албатта. Шундай бўладиган бўлса, улар янги қурилмани шунчаки бозордан қайтариб олишади”. 

Шундай бўлса-да, Обаманинг сўзларига кўра, истеъмолчилар дискли телефонларни қўллашга қайтишмаяпти ва смартфонларни ишлаб чиқаришни бекор қилиш ҳақида оғиз очишмаяпти. 

Обама соғлиқни сақлаш ислоҳоти, беморлар ҳимояси ҳамда смартфонлар яратилиши натижасида юзага келган муаммолар ҳақида сўз юритиб, буни мисол сифатида келтириб ўтди.