Яманда навбатдаги теракт оқибатида камида 30 киши ҳалок бўлди

Яманнинг Адан шаҳрида содир этилган теракт камида 30 кишини ҳаётдан олиб кетди. Бу ҳақда маҳаллий ҳарбийлар ва тиббиёт ходимларига асосланиб, Франс Пресс агентлиги хабар тарқатди.

Агентлик маълумотига кўра, портлаш худкуш террорчи томонидан амалга оширилган. У ўзини Адан шаҳри шимоли-шарқида ўз хизмат ҳақини олиш учун йиғилган ҳарбийлар гуруҳи олдида портлатиб юборган. Бу портлаш оқибатида яна ўнлаб кишилар жароҳатлангани айтилмоқда.

Бир ҳафта олдин Аданда хизматга янги чақирилган ҳарбийлар лагерида рўй берган портлаш оқибатида 30 киши ҳалок бўлганди.