Ўзбекистоннинг Туркиядаги элчиси Анқарада Россия элчиси ўлдирилишига гувоҳ бўлди

Ўзбекистоннинг Туркиядаги элчиси Улфат Қодиров россиялик ҳамкасби Андрей Карлов ўлдирилган кўргазмада иштирок этгани маълум бўлди. Бу ҳақда Қирғизистоннинг Туркиядаги элчиси Иброҳим Жунусов фейсбукдаги саҳифасида айтиб ўтган.

«Биз кўргазмада Ўзбекистон элчиси ҳамда Карлов билан бир қаторда туриб суҳбатлашдик. Ёнимизда қандайдир йигит айланиб юрарди. Мен уни тансоқчи деб ўйладим. Карлов сўзга чиқишни бошлагач эса, у ўт очди. У баланд овозда ҳамма ерга ётиши кераклиги ҳақида бақирди. Ўқлари тугаганидан кейин эса қочиб кетди. Мен у ерда ҳайдовчи билан бирга эдим. Кўргазмада ҳаммаси бўлиб 150 киши бор эди», - деган Жунусов.
 
Эслатиб ўтамиз, россиялик элчи Андрей Карлов Туркиянинг Анқара шаҳрида рўй берган террорчилик акти оқибатида ўлдирилди. БМТ Хавфсизлик Кенгаши қотилликни теракт деб тан олди.

Маълумот учун, ушбу ҳодисадан сўнг бир қатор давлатлар Туркиядаги ўз элчихоналарида хавфсизлик чоралари кучайтирилганини маълум қилишди. Ўзбекистон Ташқи ишлар вазирлиги эса бу борада ҳозирча расмий изоҳ бермаган.