Трамп АҚШ Исроилга беҳурматлик қилмаслиги кераклигини айтди

Фото: Reuters

АҚШнинг янги президенти этиб сайланган Дональд Трамп АҚШ Исроилга нисбатан "бундай беҳурматлик ва беписанд муносабатда бўлишни давом эттирмаслиги керак" деб айтди.

"Аввал улар (Исроил) АҚШ тимсолида катта дўстга эга бўлганлар, бироқ ҳозир...", деб ёзди Трамп твиттерда.

Трампнинг айтишича, йил бошида "даҳшатли Эрон келишуви", йил охирида эса "БМТ резолюцияси" юз берди.

Трамп АҚШ иштирок этган Эрон билан ядровий битимни бир неча маротаба танқид қилган.

"Исроил, кучли бўлиб қол, 20 январга яқин қолди", деб ёзганди Трамп бошқа бир твитида.

20 январда Трамп инаугурацияси бўлиб ўтади.

Эслатиб ўтамиз, аввалроқ БМТ Хавфсизлик кенгаши Исроилга Фаластин ҳудудларида турар-жойлар қуришни тақиқловчи резолюцияни қабул қилганди. Трамп бу резолюцияга тақиқлов қўйишга чақирган. Шундан кейин Трамп БМТни "ёқимли суҳбат қуришдан бошқасига ярамайдиган жой" деб айтган.

Тайёрлаган: Шуҳрат Раҳимов

#Дональд Трамп #АҚШ #Исроил