Европа Иттифоқининг сайёҳлар энг кўп борувчи мамлакати маълум қилинди

Испания Европа Иттифоқининг туристлар орасида 2016 йилдаги энг оммабоп давлати бўлди. Бу ҳақда ЕИнинг Eurostat статистик хизмати хабар берди.

Испанияда саёҳатчилар ўтган йил давомида меҳмонхоналарда 454 миллион кечани ўтказишган. 2015 йил билан таққослаганда ўсиш деярли саккиз фоизни ташкил қилди.

Иккинчи ўринга Франция ва Италия лойиқ топилди (395 миллион кеча). Францияда бу кўрсаткич 2016 йилда 4,6 фоизга тушиб кетган бўлса, Италияда деярли ўзгаришсиз қолди.

Кучли учликни Германия якунлаб берган. Туристлар у ердаги меҳмонхоналарда 390 миллион кечани ўтказишди. Тўртинчи ўрин Буюк Британияга насиб этди – 292 миллион. Австриядаги меҳмонхоналарда эса бу кўрсаткич 119 миллионни ташкил қилди.

Рейтингдаги ўнликка, шунингдек, Нидерландия, Греция, Польша, Хорватия ва Португалия ҳам кирган. Ўтказилган туристик кечаларнинг ортиши бўйича 2016 йилда Болгария етакчи бўлди – плюс 18 фоиз.