Трамп КХДРнинг баллистик учиришини қоралаган Абэ томонида эканини билдирди

Фото: Reuters

АҚШ президенти Дональд Трамп ва Япония бош вазири Шиндзо Абэ Шимолий Корея баллистик ракета учирганини қоралаб ўтишди. Бу ҳақда CNN телеканали маълум қилди.

«Шимолий Кореянинг ракета синовларига йўл қўйиб бўлмайди», — дея баёнот берган Абэ.

Дональд Трамп Япония бош вазирини тўла қўллаб-қувватлашини маълум қилди.

«Мен Америка Қўшма Штатлари ўзининг ажойиб иттифоқдоши Японияни 100 фоизга қўллаб-қувватлашини ҳамма тушунишини ва тўлиқ англашини хоҳлардим», — деди Трамп Япония бош вазири билан биргаликда журналистлар қаршисига чиққанида.

КХДР шимоли-ғарбидаги Пхёнан-Пукто провинциясида жойлашган полигондан 12 февраль куни маҳаллий вақт билан соат 07:55да (Тошкент вақти билан соат 03:55 да) ракета учирди. Жанубий Корея Штаб бошлиқлари қўмитаси ҳарбийлари маълумотларига кўра, ракета 500 километрга яқин масофани босиб ўтган ва Япон денгизига тушган.