Покистон жанубидаги теракт қурбонлари сони 80 нафарга етди

16 февраль куни Покистон жанубидаги Синд провинциясининг Сехван шаҳрида жойлашган сўфийлар мақбарасида содир этилган теракт қурбонлари сони 80 кишига етди. Бу ҳақда Dawn нашри маълум қилди.

Бундан олдинги хабарларда ушбу хунрезлик 74 кишини ҳаётдан олиб кетиб, яна 300дан зиёд киши жароҳатлар олишига сабаб бўлгани айтилганди.

Портлаш кечқурун, Лаъл Шаҳбоз Қаландар мақбарасида кўплаб тақводорлар сўфийлик одатлари амалга оширилаётган вақтда содир бўлди. Полиция маълумотига кўра, худкуш террорчи одамлар ичига гранатани улоқтиришга уринган, аммо бу муваффақиятсиз якунланган. Шундан сўнг у ўз танасидаги портловчи қурилмани ишлатган. Террорчи қўллаган қўлбола бомбада қарийб 8 кг динамит бўлган, шунингдек, жароҳатловчи элементлар сифатида гайкали болтлар ишлатилган.

Ушбу теракт учун жавобгарликни ИШИД ўз зиммасига олди.