АҚШнинг озиқ-овқат ишлаб чиқарувчи Kraft Heinz компанияси Unilever британ-голланд компаниясига компанияларни бирлаштириш бўйича битимни таклиф қилганини тасдиқлади. Heinz’нинг маълум қилишича, озиқ-овқат ва шахсий гигиена маҳсулотлари ишлаб чиқарувчи Unilever бу таклифни рад этган, бироқ АҚШ компанияси битим шартлари бўйича келишувга эришишга умид қилмоқда.
Kraft Heinz компанияси Unilever’га бир акцияси учун 50 доллар таклиф қилган. Шу тариқа Unilever 143 млрд долларга баҳоланган.
"Unilever компания акциядорлари учун бу бирлашишдан молиявий ёки стратегик устунликларни кўрмагани учун таклифни рад этди. Компания бу битимни келгусида муҳокама қилишга асос кўрмаяпти", деб айтилган Unilever’да. Компанияда айтилишича, "харидор" компанияни "анчагина паст баҳолаган".
Бу икки компаниянинг бирлашиши тарихдаги энг йирикларидан бири бўлиши мумкин эди. Kraft Heinz капиталлашуви 102 млрд долларни, Unilever’ники 120 млрд долларни ташкил қилади. Kraft Heinz 200 та давлатда фаолият олиб боради. Ҳозирда бу компанияга 200 га яқин бренд, жумладан Jacobs, Maxwell House ва Carte Noire қаҳвалари, Alpen Gold, Cadbury, Milka ва Toblerone шоколадлари, Heinz’нинг кетчуп ва болалар озиқалари киради. Unilever эса 100 тадан кўпроқ давлатда ишлайди ҳамда Knorr, Hellmann's, Lipton, Dove, Cif ва Domestos каби брендларга эга.
