Unilever Россиядаги бизнесини сотишга рози бўлди

Косметика, парфюмерия ва маиший кимё глобал бозорининг етакчиларидан бири Россияда 1991 йилдан бери ишлаётганди. Unilever, бошқалар қаторида, Domestos, Axe ва Dove брендларининг эгаси ҳисобланади.

Фото: Tatan Syuflana / AP Photo

Истеъмол товарлари ишлаб чиқарувчи дунёдаги энг йирик компаниялардан бири бўлган Британиянинг Unilever концерни хорижий сармояларни назорат қилиш бўйича ҳукумат комиссиясидан ўз бизнесини Россияда сотиш учун рухсат олди, деб хабар берди РБК агентлиги 4 сентябр, чоршанба куни манбага таяниб. Маълумотни федерал амалдор тасдиқлади.

Агентлик суҳбатдошининг сўзларига кўра, Unilever Россия бозорини тарк этишига олиб келадиган келишув август ойи охирида тасдиқланган. Компаниянинг Россия бизнеси қиймати 35-40 миллиард рублга баҳоланмоқда. Шу билан бирга, 2022 йил охирида Unilever Россиядаги активлари 900 миллион еврога баҳоланган (Марказий банкнинг жорий курси бўйича 88 миллиард рублдан ортиқ). 2023 йил охирида концерннинг Россия бизнесининг баҳоси 600 миллион еврогача (59 миллиард рубл) камайди.

Манбанинг таъкидлашича, харидор «аниқланган, аммо номи айтилмаган». Unilever компания брендларига эга бўлган «Юнилевер Русь» бўлинмасини сотади. У «Магнат» ва «Инмарко» музқаймоқ брендлари, «Чистая линия», «Бархатные ручки», «Черный жемчуг» ва бошқаларга бўлган ҳуқуқларга эга. Июн ойида Unilever Россия Федерациясида ишлаб чиқарилган халқаро брендларининг номларини руслаштиришни бошлади. «Доместос», «Сиф», «Дав», «Рексона» савдо белгиларига аризалар Роспатентга топширилди.

Жаҳон косметика бозоридаги етакчилардан бири

Unilever косметика, парфюмерия ва маиший кимё жаҳон бозорида етакчилардан бири ҳисобланади. Axe, Dove, Rexona, Sunsilk, Knorr, Domestos ва бошқа брендларга эгалик қилади. Unilever Россияда 1991 йилдан бери фаолият юритади. Компанияда уч мингга яқин ишчи ва тўртта йирик ишлаб чиқариш майдончаси бор эди.

Россиянинг Украинага қуролли ҳужумидан кейин Unilever Россия Федерациясини тарк этмади. Компания ўз маҳсулотларини Россияга етказиб беришни ва ўз ҳудудидан товарларни экспорт қилишни, шунингдек, Россия бозорига сармоя киритишни тўхтатди. Шу билан бирга, концерн Россия аҳолисини шахсий гигиена воситалари ва маҳаллий фабрикаларда ишлаб чиқарилган маҳсулотлар билан таъминлашни давом эттиришга ваъда берди.

РБК манбасининг тахмин қилишича, активларни сотиш тўғрисидаги қарорга «ўсиб бораётган геосиёсий кескинлик ва компания босим остидаги ҳолати» таъсир қилган бўлиши мумкин. 2023 йил июл ойида Украина коррупциянинг олдини олиш миллий агентлиги Unilever’ни «уруш ҳомийлари» рўйхатига киритди.