Швейцария компанияси 4 эшикли электр суперкар яратмоқчи

Швейцариянинг Classic Factory компанияси янги лойиҳаси – 4 эшикли Elextra суперкарининг тизерини чоп этди. Ҳозирча машинанинг фақатгина профилини кўриш мумкин. Суперкар Женевадаги моторшоуда оммавий равишда намойиш қилинади.

Компаниянинг илк лойиҳаси – Lyonheart K спорткари 2013 йилда пайдо бўлган. Модель алюминийдан ясалган кузов, 5 литр ҳажмга эга 8 цилиндрли Jaguar двигатели ва 6 поғонали "автомат" узатмалар қутисини олган. Бу машина 0 дан 100 км тезликка 3,9 сонияда эришади. Қўлда йиғилган спорткар 360 минг еврога баҳоланган ва ундан 250 дона ишлаб чиқарилган. 

Elextra лойиҳасига компаниянинг дизайнери ва раҳбари Роберт Палм ва даниялик тадбиркор Поул Сол бошчилик қилмоқда.   

"Elextra лойиҳасининг бош ғояси – энг ҳашаматли итальян суперкарларини эслатувчи  кузов кўринишини пастқам футуристик кўриниш ва энг илғор замонавий технологиялар билан уйғунлаштиришдан иборат", деб айтди Палм. 

Бу автомобиль ҳақида шу маълумки, у Швейцарияда лойиҳаланади, "дунёдаги энг яхши электр платформада" қурилади ва 100 нусхада ишлаб чиқарилади. Автомобилларни "машиналарни кам нусхада ишлаб чиқариш билан шуғулланувчи бутун дунёга машҳур компания"нинг Штутгартдаги корхонасида қўлда йиғиш режалаштирилган.    

Тўрт эшикли Elextra 4 та ўриндиқ, тўлиқ привод билан жиҳозланади ва 100 км/соат тезликка 2,3 сонияда эриша олади.