Brexit туфайли 100га яқин халқаро компания Нидерландияга кўчиб ўтади

100га яқин халқаро компания Буюк Британиянинг Европа иттифоқидан чиқиш ҳақидаги қарори туфайли Нидерландияга кўчиб ўтиши мумкин. Бу ҳақда Нидерландия саноат ва иш берувчилар конфедерацияси президенти Ханс де Бур маълум қилди, деб хабар бермоқда Financieele Dagblad газетаси.

Нашр маълумотига кўра, де Бур сўнгги бир неча кун мобайнида Лондонда бўлиб, Brexit’дан кейинги вазиятни бизнес-ҳамжамият вакиллари билан муҳокама қилган. "Нидерландияга кўчиб ўтишга қизиқиш, аввалгидан анча юқори, - дея таъкидлаб ўтди Нидерландиядаги 115 минг юридик шахс аъзоси саналувчи Конфедерация президенти. – Бунинг асосий сабаби деб – Буюк Британиянинг аниқ бир позицияси йўқлиги кўрсатилмоқда. Бундай ҳолат йиллар давомида сақланиб қолиниши мумкин". "Гап юзга яқин компания ҳақида бормоқда, уларнинг барчаси ҳам молия соҳасида эмас", - деди у. Президент аниқ ташкилотлар номини келтирмаган.

Шунингдек де Бур ЕИ Brexit’га йўл қўймаслик учун ҳаракат қилиши кераклигини, агарда бу рўй берса, ҳамжамият Буюк Британияни ЕИ Божхона иттифоқида сақлаб қолиш учун барча ишни амалга ошириши лозимлигини таъкидлаб ўтди.