Америкалик актёр Том Ҳэнкс Оқ уй матбуот корпусига қаҳва дамловчи машина совға қилди, унинг ёнига журналистларга ҳақиқат ва адолат учун курашишда давом этиш билдирилган тилак туширилган қоғоз қўшилди. Hollywood Reporter'да таъкидланишича, Ҳэнкс ҳақиқат учун кураш сўзига алоҳида урғу берган.
Манбага кўра, Том Ҳэнкс совға қилган қаҳва дамловчи машина Pasquini брендига тегишли бўлиб, зангламайдиган пўлатдан ясалган. Матбуот корпуси журналистлари ўзларининг ижтимоий тармоқлардаги саҳифаларида актёрга миннатдорчилик билдиришган.
Таъкидланишича, бу актёрнинг Оқ уйга биринчи марта бундай совға тортиқ қилиши эмас. Биринчи марта 2004 йилда қаҳва ускунасини ОАВ ходимларининг ўзлари харид қилишларидан хабар топган Ҳэнкс уларга шундай совға улашган.
2010 йилда Ҳолливуд юлдузи матбуот конференциясидан кейин журналистлар унинг аввалги совғасини тозалашни унутаётганига эътибор қаратган ва тез орада уларга янги қаҳва ускунасини йўллаган.
