Австрия авиакомпанияси дунёдаги энг қисқа рейсдан воз кечди

Фото: Plane Spotters

Австриянинг People's Viennaline авиакомпанияси дунёдаги энг қисқа рейсдан воз кечди. Бунга авиакомпания хизматларига талаб пастлиги сабаб бўлган. Бу ҳақда Berliner Kurier таблоиди хабар бермоқда.

Санкт-Галлен-Альтенрайн (Швейцария) — Фридрихсхафен (Германия) йўналиши бўйича охирги рейс 14 апрелга белгиланган. "Муайян ривожланиш кузатилганди, бироқ биз режалаштирилган йўловчилар миқдорига эриша олмадик", деб айтган People's Viennaline эгаси Маркус Копф.

Ушбу рейс 2016 йил 2 ноябрда бошланган. Йўналиш узунлиги 21 километрга яқинни, парвоз вақти 8 дақиқани ташкил қилган. У ерга ва ортга чипта нархи 40 евро турган.

People's Viennaline авиакомпанияси 2010 йилда ташкил топган. У Санкт-Галлен-Альтенрайн аэропортида жойлашган ва асосан Хорватия, Италия ва Испанияга чартер рейслар амалга оширади. Компания бош қароргоҳи Венада жойлашган. Авиакомпания ҳисобида Embraer 170 ва Embraer 145 русумидаги бор-йўғи иккита йўловчи самолёти бор.