Путин Саудия Арабистони қиролини Россияга таклиф қилди

Россия президенти Владимир Путин ва Саудия Арабистони қироли Салмон ибн Абдулазиз ал-Сауд  ўртасида телефон мулоқоти бўлиб ўтди, деб хабар бермоқда Кремль матбуот хизмати. 

"Саудия Арабистони қироли Санкт-Петербургдаги ваҳший терактни қоралади ҳамда Россия президенти ва Россия халқига чуқур ҳамдардлик билдирди", деб айтилди Кремлда.

Икки давлат раҳбарлари террорчилик хавфига қарши кураш бўйича халқаро саъй-ҳаракатларни фаоллаштириш муҳимлигини тасдиқладилар. Бундан ташқари, томонлар сиёсий ва савдо-иқтисодий соҳаларда ҳамкорликни ошириш зарурлигини қайд қилишди.

"Турли даражаларда тузилажак шартномалар муҳокама қилинди. Владимир Путин Саудия Арабистони қиролини Россияга таклиф қилганини тасдиқлади", дейилди хабарда.