Эркак "американча тепаликлар" аттракционида қуш билан тўқнашди

Испанияда бир эркак "американча тепаликлар" аттракционида учиш вақтида қуш билан тўқнашиб кетди. Ушбу ҳолатнинг аттракцион вагонеткасига ўрнатилган камерадан ёзиб олинган видеоси YouTube’даги ValeRocks каналида жойлаштирилди.

Воқеа Барселона яқинидаги "Парк Авентура" кўнгилочар боғида юз берган. Европадаги энг катта вертикал тезлаштиргич Red Force’да учиш вақтида эркакнинг томоғига парвоз қилаётган қуш келиб урилган. Кўринишича, зарба кучли бўлганидан эркак бир фурсат нафас ололмай қолган. Эркак бир неча сониядан кейин ўзига келгач, унга қуш келиб урилганини англаган ва томоғига ёпишиб қолган қушни четга отиб юборган. Эркак, шунингдек, қушнинг урилишидан юзидан жароҳат олганини кўриш мумкин. 

Видеога қолдирилган изоҳларда вагонетканинг 180 км/соат тезлик билан ҳаракатлангани ва эркак юзида тўқнашувдан кейин қон излари қолганидан қушнинг тақдири эркакникидан анча аянчлироқ тугагани тахмин қилинган.