Японияда тошқинлардан кейин камида 15 киши бедарак йўқолди

Япония жанубида кучли ёмғирлар сабабли юзага келган тошқинларда 15 киши бедарак йўқолди.

Япония вазирлар маҳкамаси бош котиби Есихидэ Суганинг матбуот-анжуманида маълум қилишича, "топилмаётган одамлар ҳақида кўплаб хабарлар келиб тушмоқда".

У табиий офат билан курашга 7,5 минг ҳарбий, полициячи ва қутқарувчилар жалб қилинганини маълум қилди. 40 та вертолёт шошилинч парвозларга шай ҳолатга келтирилган.

Япония бош вазири ўринбосари Таро Асо Кюсю оролида фавқулодда вазият шаклланганини эълон қилган.

Инфратузилма объектлари, йўллар, турар жой бинолари ва бошқа иншоотларга анча зиён етган. Аҳолининг бир қисми сув билан тўсиб қўйилган. Ҳозирча ҳукумат кўрилган талофат қийматини ҳисоб-китоб қила олмаяпти.

Метеорологлар ёмғирларнинг 7 июлгача давом этиши сабабли вазиятнинг ёмонлашиши, кўчкилар юз бериши, дарёлар ўзанларидан чиқишидан огоҳлантирмоқдалар.

Айни вақтда эвакуация қилиниш ҳақидаги огоҳлантиришни Фукуока ва Оита префектураларининг 550 мингдан кўпроқ аҳолиси олган.